پاکستان تشقی ایشلر وزیرلیگی اعلان قیلگن معلوماتگه کۉره، پاکستان و افغانستان اۉرتهسیدهگی مذاکرهلرنینگ ایکّینچی باسقیچی بوگون (شنبه،۳ عقرب) تورکيهنینگ استانبول شهریده بۉلیب اۉتهدی. مذکور اوچرهشووده تامانلر قطرنینگ بیرینچی باسقیچده محاکمه قیلینگن برچه مسألهلر یوزهسیدن ینه صحبتلشهدیلر.
جیو نیوزنینگ خبریگه کۉره، پاکستان تشقی ایشلر وزیرلیگی سۉزلاوچیسی طاهر حسین اندرابي جمعه کونی اۉزینینگ ایلک مطبوعات انجمنیده، «استانبول مذاکرهلری بیرینچی باسقیچنینگ دوامی بۉلیب، او ایکّی قۉشنی مملکت اۉرتهسیده اۉت آچیشنی تۉختهتیش (اۉتیش) کېلیشوویگه آلیب کېلگن اېدی» دېب تیلگه آلگن.
اونینگ کوپهیتیریشیچه، پاکستان استانبول مذاکرهلریده افغانستان حدودیدن کېلیب چیقهیاتگن تروریزم تهدیدلریگه قرشی تېکشیریلهدیگن و ایشانچلی نظارت میکانیزمینی یرهتیشنی اینتیقلیک بیلن کوتماقده.
اندرابی، «پاکستان منطقوي تینچلیک و برقرارلیککه صادق بۉلگن مسوول دولت صفتیده ضدیتنی کوچهیتیریشنی ایستهمهیدی. اما او طالبان حکومتیدن خلق ارا مجبوريتلریگه رعایه اېتیشنی و ایشانچلی چاره-تدبیرلر آرقهلی پاکستاننینگ خوفسیزلیک تشویشلریگه جواب بېریشنی طلب قیلهدی. بو جملهدن، پاکستان تحرک طالبان (تیتیپی) و بلوچ آزادلیک اوردوسی (بیالای) کبی تشکیلاتلرگه قرشی انیق عمللرنی اۉز ایچیگه آلهدی.» طالبان کېچه ایچکی ایشلر وزیرلیگی معاونی باشچیلیگیدهگی هیاتنی تورکيهگه یوبارگنینی تصدیقلهدی.
طالبان مطبوعات سۉزلاوچیسی ذبیحالله مجاهد، «تورکيهدهگی ییغیلیشده حلی حل قیلینمهگن مسألهلر محاکمه قیلینهدی»دی دېب اورغولهدی.
پاکستان و طالبان اۉتگن هفته بیر هفتهلیک قوراللی تۉقنهشوولردن سۉنگ، قطر و تورکيه واسطهچیلیگیده دوحهده اۉت آچیشنی توختهتیش بۉییچه کېلیشووگه اېریشگن اېدی.
اوشبو کېلیشووگه کۉره، تامانلر بیر- بیرینینگ حدودي دخلسیزلیگینی حرمت قیلیش و برقرار تینچلیکنی مستحکملش اوچون میکانیزملر یرهتیش مجبوريتینی آلگنلر.
پاکستاننینگ تأکیدلشیچه، پاکستانلیک جنگریلر، جملهدن تیتیپی، افغانستانده باشپناه تاپگن و او یېردن پاکستانگه قرشی حرکت قیلماقده.
طالبان اېسه بو دعوالرنی رد اېتیب، «افغانستان حدودی هېچ بیر دولت اوچون تهدید اېمس،» دېیه بیلدیرگن.
ذبیحالله مجاهد ایلگریراق «یقین کېلهجکده قطر و تورکيه واسطهچیلیگیده ایکّی تامان نینگ دعوالرینی اۉرگنیش و کېلیشوونی عملده قۉللش اوچون مخصوص میکانیزم یرهتیلهدی» دېب تیلگه آلگن اېدی.
