طالبلرنینگ معلوم قیلیشیچه، سریک ژومانگارین باشچیلیگیدهگی قازاقستان هیئتی کابلگه تشریف بویوریب، طالبلرنینگ صنعت و تجارت وزیری نورالدین عزیزي بیلن اوچرهشگن.
طالبلر صنعت و تجارت وزیرلیگی بوگون (شنبه، ۳۰ جوزا) ترقهتگن بیاناتگه کۉره، قازاقستان هیئتی کابلگه «افغان–قزاق تجارت-اقتصادي فارومی» همده قازاقستان جمهوریتی محصولاتلری و ایشلب چیقریشلری کۉرگزمهسیده اشتراک اېتیش مقصدیده کېلگن.
بیاناتده ایتیلیشیچه، هیئت ترکیبیگه تورلی ساحهوي ادارهلر رهبرلری اۉرینباسرلری، اقتصادي تشکیلاتلر مسووللری و قازاقستان خصوصي سکتوری نینگ تنیقلی نمایندهلری هم کیرهدی.
طالبلر صنعت و تجارت وزیرلیگی افغانستان و قازاقستان اۉرتهسیدهگی اقتصادي همده تجارت علاقهلری کېنگهییب بارهیاتگنینی تأکیدلب، ایکّی تامان تجارت، ترانزیت، قیشلاق خۉجهلیگی، آزیق-طعام صناعتی و خاماشیا تأمیناتی ساحهلریده همکارلیکنی کوچهیتیریشگه قیزیقیش بیلدیرهیاتگنینی معلوم قیلدی.
اۉتگن ییلی هم قازاقستان نینگ ایشلب چیقریش و صنعت کمپنیلری کابلده اۉز محصولاتلری کۉرگزمهسینی تشکیل اېتگن اېدی.
طالبان مرکزي آسیا دولتلری بیلن اقتصادي همکارلیکنی رواجلنتیریش آرقهلی منطقوي علاقهلرنی کېنگهیتیریشگه اینتیلماقده.
اۉتگن هفته کابلده افغانستان مرکزي آسیا تدقیقات مرکزلری قۉشمه ییغیلیشی بۉلیب اۉتدی. اونده تاجیکستان، اۉزبېکستان، تورکمنستان، قازاقستان، قیرغیزستان و آذربایجان نمایندهلری قتنهشگن.
مذکور ییغیلیشده طالبلر تشقی ایشلر وزیری امیرخان متقي افغانستان و مرکزي آسیا مملکتلری عمومي کېلهجککه اېگه اېکنینی تأکیدلهگن.
