محلی منبعلرنینگ معلوم قیلیشیچه، دایکندی نینگ شهرستان اولسواللیگیده سابق حکومت اوردوسی اعضالریدن بیری نامعلوم قوراللی شخصلر تامانیدن اۉلدیریلگن.
محلي منبع نینگ بیلدیریشیچه، سابق حربي یاسیر حسینی جمعه کونی (۲۹ جوزا) کېچقورون شهرستان مرکزیدهگی القان بازاری منطقهسیده ایکّی قوراللی شخص تامانیدن اۉق اوزیلیشی عاقبتیده اۉلدیریلگن.
منبعگه کۉره، حسینی سابق حکومت اوردوسیده خدمت قیلگن. جمهوریت قولهگنیدن کېین او القان بازاریده دوکانچیلیک بیلن شغللنهیاتگن اېدی. جمعه کونی کېچقورون دوکانینی یاپهیاتگن پیتده تۉپّانچه بیلن نشانگه آلینگن.
ینه بیر منبع نینگ ایتیشیچه، یاسیر حسینی حربي اکادمی بیتیرووچیسی بۉلگن. جمهوریت قولهگنیدن سۉنگ او بیر مدت تاجیکستانگه ایشلش اوچون کېتگن، کېینچهلیک اېسه افغانستانگه قَیتیب، تجارت بیلن شغللنه باشلهگن.
شونینگدېک، منبعلر حسینی نینگ سابق پارلمان وکیلی شیرین محسینی نینگ کویاوی بۉلگنینی اَیتماقده. اونینگ تورموش اۉرتاغی عارف داوری حاضرده دایکندی نینگ ناومیش اولسواللیگیده طالبان اولسوالی صفتیده فعالیت یوریتماقده.
حاضرچه اوشبو قاتللیک نینگ سببلری انیقلنمهگن.
یاسیر حسینینینگ اۉلدیریلیشی پروان ولایتیده ینه بیر سابق حربي نینگ جسدی تاپیلگنی حقیدهگی خبردن بیر کون اۉتیب صادر بۉلدی.
منبعلرگه کۉره، پروانده تاپیلگن سابق حربي حشمتالله بۉلیب، او آلدین ۲۰۱-سېلاب قول اردو ترکیبیدهگی ۴-کندک نینگ ۳-لوا قوماندانی وظیفهسیده خدمت قیلگن.
معلوماتلرگه کۉره، حشمتالله اۉتگن هفته بېدرَک یۉقالگن و تۉرت کوندن کېین، جمعه کونی (۲۹ جوزا)، اونینگ جسدی تاپیلگن. او کېینچهلیک دفن اېتیلگن.
سۉنگگی بېش ییل دوامیده کۉپلب سابق حربيلر نینگ سِرلی طرزده اۉلدیریلگنی حقیده خبرلر ترقهلگن. اَیریم منبعلر بو قاتللیکلرده طالبان اعضالرینی عیبلب کېلهدی. طالبان اېسه اۉز نوبتیده رهبری تامانیدن اعلان قیلینگن عمومي عفو فرمانیگه عمل قیلهیاتگنینی تأکیدلب کېلماقده.
