پاکستان تشقی ایشلر وزیرلیگی ایران و امریکا اۉرتهسیدهگی «تخنیکي مذاکرهلر» اېرتهگه (یکشنبه،۳۱ جوزا) سوئیس نینگ بورگن اشتوک بۉلیب اۉتیشینی معلوم قیلدی.
وزیرلیک بیاناتیگه کۉره، مذاکرهلرده امریکا و ایران نمایندهلری بیلن بیرگه پاکستان همده قطر واسطهچیلری هم اشتراک اېتهدی.
پاکستان تشقی ایشلر وزیرلیگی مملکت اوشبو جریاننی واسطهچی صفتیده قۉللب-قوّتلشده دوام اېتیشینی و اسلام آباد کېلیشووی دایرهسیده اېریشیلگن توشونوولرنی عملگه آشیریش اوچون حرکت قیلیشینی بیلدیرگن.
امریکا یېتکرمهلرینینگ خبر بېریشیچه، امریکانینگ اۉرته شرق دولتلری اوچون خاص نمایندهسی استیو ویتکاف همده دونالد ترامپ نینگ کیاوی جارد کوشنر مذاکرهلرده قتنهشیش اوچون سوئیس گه یۉل آلگن.
ایران تشقی ایشلر وزیرلیگی هم مملکت مذاکرهچی هیئتی بوگون کېچقورون سوئیس گه جۉنهب کېتیشینی معلوم قیلگن.
ایران تشقی ایشلر وزیرلیگی مطبوعات سۉزلاویسی اسماعیل بقایی نینگ ایتیشیچه، «ایران هیئتی نینگ سفری مذاکرهلرنینگ ایکّینچی باسقیچی باشلنگنینی انگلهتمهیدی، بلکه اوّلگی مجبوريتلرنینگ بجریلیشینی کوزهتیش و دوام اېتتیریشگه قرهتیلگن».
بو مذاکرهلر اسرایل نینگ جَنوبي لبناندهگی هجوملری دوام اېتهیاتگن بیر پیتده اۉتکزیلماقده. ایران نینگ خاتم الانبیا مرکزي قرارگاهی امریکا اوروشنی یکونلش بۉییچه کېلیشوونینگ بیرینچی بندینی بجرمهگنی سببلی هرمز بۉغازی یاپیلیشینی اعلان قیلگن.
شونینگدېک، ایران اسلام انقلابی قۉریقچیلری دېنگیز کوچلری «هرمز بۉغازی یاپیلگن و کېمهلر اونگه یقینلشمسلیگی کېرهک، عکس حالده اولرنینگ خوفسیزلیگی خوف آستیده قالهدی»، دېگن بیانات بیلن چیققن.
اېسلهتیب اۉتمیز، ایران و امریکا اۉرتهسیدهگی مذاکرهلر جمعه کونی سوئیس ده باشلنیشی کېرهک اېدی. بیراق سوئیس تشقی ایشلر وزیرلیگی هېچ قندهی ایضاح بېرمسدن اوچرهشوولر کېینگه قالدیریلگنینی معلوم قیلگن اېدی.
