طالبان رسميلرینینگ معلوم قیلیشیچه، اولرنینگ رهبری هبتالله آخوندزاده بویروغی اساسیده، کنر دریاسی اوستیده برق تۉغانی قوریلیشی رېجهلشتیریلگن.
طالباننینگ سوو و برق وزیری عبدالطیف منصور، کنر دریاسینینگ سوویدن برق تۉغانی قوریلیشی بیلن بیرگه آرتیقچه سوو ینه دریانینگ اۉز اۉزنیگه قَیتریلهدی دېگن.
منصور «بیزنینگ تېکشیروومیزگه کۉره، بو سوو افغانستان خلقیگه تېگیشلیدیر و هېچ کیمگه ضرر یېتکزمهیدی. لایحهلشده عیناً شو سوودن فایدهلنیلهدی و آرتیقچه سوو ینه کنر دریاسیگه قۉییب یوباریلهدی، باشقه یۉنهلیشگه بوریلمهیدی. شو سبب هېچ کیم خواطر آلمهسین» دېدی طالبان سوو برق وزیری.
کنر دریاسی پاکستاننینگ چیترال منطقهسیدن باشلنیب، کنر واديسی آرقهلی آقهدی، سۉنگره کابل دریاسیگه قۉشیلیب و ینه پاکستان اۉتهدی.
طالبان وزیرینینگ سۉزلریگه کۉره، کنر دریاسیده تۉغان قوریش مسألهسی ایلگری، جمهوریت دوریده هم کۉتریلگن بۉلیب، اۉشه پیتده پاکستان بونگه راضیلیک بیلدیرگن.
اونینگ قۉشیمچه قیلیشیچه، پاکستانلیک متخصصلر هم اۉرگنیش آلیب باریب، بو لایحه پاکستانگه ضرر یېتکزمسلیگینی تصدیقلشگن.
پاکستان رسميلری حاضرچه طالبان نینگ بو ینگی قراریگه مناسبت بیلدیرمهگن.
آلدینراق پاکستان یېتکرمهلری، پاکستان چیترال دریاسینینگ یۉنهلیشینی، او افغانستانگه کیریب کنر دریاسیگه قۉشیلهدیگن جایده، اۉزگرتیریشنی و اونی سوات دریاسیگه بوریشنی رېجهلشتیرگن.
افغانستاننینگ چېگرهوي دریالری اوستیدهگی قوریلیش ایشلری دایما قۉشنی دولتلرنینگ اساسي تشویشلریدن بیری بۉلیب کېلگن.
سۉنگّی ییللرده افغانستان و ایران اۉرتهسیده هلمند (هیرمند) دریاسی سووی بۉییچه ضدیتلر کوزهتیلگن. افغانستان حاضرگچه اوشبو دریا اوستیده ایکّی تۉغان برپا اېتگن.
