امریکا جمهور رئیسی و دونالد ترامپنینگ اۉرینباسری جیدی ونس، اسرائیل پارلمانی نینگ (کنست) غربي ساحلنی اۉز حدودیگه قۉشیش حقیدهگی قرارینی «احماقانه سیاسي نمایش» دېب اتهدی.
جمهور رئیس اۉرین باسری بوگون (پنجشنبه، ۲۳ اکتبر) ژورنالیستلرگه، «اگر بو سیاسي نمایش بۉلگن بۉلسه، بو جوده احماقانه سیاسي نمایش اېدی و مېن شخصن بونی حقارت دېب بیلهمن» دېب اظهار قیلدی.
او نینگ قۉشیمچه قیلیشیچه «ترامپ مأموریتینینگ سیاستی غربي ساحل اسرائیل تامانیدن قۉشیب آلینمسلیکدن عبارت، بو بیزنینگ قطعي سیاستیمیز بۉلیب قالهدی.»
کېچه اسرائیل پارلمانی غربي ساحلنی اسرائیل حدودیگه قۉشیشنی نظرده توتووچی قانون لایحهسینی دستلبکی باسقیچده معقولهدی.
بو قرار غزده اۉت آچیشنی تۉختهتیش بیلن بیر وقتده قبول قیلیندی و مسلمان مملکتلر همده یقین شرق دولتلری تامانیدن کېسکین قارهلندی.
اوّلراق امریکا جمهور رییسی دونالد ترامپ هم اسرائیلگه غربي ساحلنی اۉز حدودیگه قۉشیشگه رخصت بېرمسلیگینی بیلدیرگن اېدی.
بویوک بریتانيا، کانادا، آسترلیا، فرانسه و بیر قنچه اروپا دولتلری فلسطیننی مستقل دولت صفتیده تن آلگنیدن سۉنگ، اسرائیل باش وزیری بنیامین نتانیاهو اۉنگ قناتدهگی اتفاقچیلری تامانیدن غربي ساحلنی اسرائیلگه قۉشیشگه باسیم آستیده قالگن.
اسرائیل نینگ « اِی-۱لایحهسی» دېب اتهلووچی ینگی شهر قوریلیش رېجهسی غربي ساحلنی ایکّی قِسمگه بۉلیب، اونی شرقي قدوسدن اجرهتهدی.
بو لایحه بیرلشگن ملتلر تشکیلاتی و خلق ارا همجميت تامانیدن کېسکین تنقید قیلینماقده. کۉپلب دولتلر یقین شرقدهگی ماجرانی تینچ یۉل بیلن حل اېتیش اوچون اسراییلنی غربي ساحلده قوریلیش ایشلرینی تۉختهتیشگه چقیرماقده.
