یازووچی: ح خ
طالبلر اۉزی نینگ اېنگ سۉنگی کۉرسهتمسیده دولت ادارهلری نینگ برچه خادملری اوچون سمارت فونلردن فایدهلنیشنی تعقیقلهدی. بو قرار گروه نینگ اصل مقصد و ماتیولری حقیده کۉپلب سواللرنی یوزهگه کېلتیرماقده. اجتماعي ترماقلرده ترقهلگن رسمي حجتلرگه کۉره، طالبلر رهبری ملا هبتالله آخوندزاده برچه دولت ادارهلریده سمارت فونلردن فایدهلنیشنی تعقیقلهگن. اوشبو فرمان چیقریلگنیدن اوچ کون اۉتیب، طالبان ایچکی ایشلر وزیرلیگی عالي محکمه بیلن همکارلیکده اونی مملکت نینگ تورلی ولایتلریده اجرا اېتیش بۉییچه کۉرسهتمه یوبارگن.
یېتکرمهلرگه سیزدیریلگن حجتلردن بیری غور ولایتیدهگی طالبان خوفسیزلیک قوماندانلیگی نینگ مکتوبی دیر. دولت ادارهلریگه یوباریلگن اوشبو مکتوبده شوندهی دېییلهدی: «حربي، ملکی و خدمت کۉرسهتیش ساحهسیدهگی برچه خادملر اوچون سمرتفانلردن فایدهلنیش مطلقا تعقیقلنهدی. بو تعقیق ایش جاییده هم، اویده هم عمل قیلهدی و قاعدهنی بوزگنلرگه نسبتاً قانوني چارهلر کۉریلهدی».
مذکور قرار سۉنگی آیلرده طالبان فعالیتی یوزهسیدن تنقیدلر کوچهیگن بیر پیتده قبول قیلیندی. اجتماعي ترماقلر افغانستاندهگی حبسگه آلیشلر، زۉرآورلیک حالتلری، خلق ناراضیلیکلری و خوفسیزلیککه عاید واقعهلر عکس اېتگن فوتو همده ویدېولرنی ترقهتیش نینگ اېنگ مهم منبعلریدن بیریگه ایلنگن. اوشبو ماتریاللر نینگ کتّه قِسمی دولت خادملری یاکه حکومت توزیلمهلریگه کیریش امکانیگه اېگه بۉلگن شخصلر تامانیدن تصویرگه آلینیب، نشر قیلینماقده.
بعضی کوزهتووچیلر سمارت فونلردن فایدهلنیشنی تعقیقلشنی طالبان نینگ اخبارات آقیمینی چېکلش و حکومت ادارهلری ایچیدن حجتلر همده تصویرلر نینگ سیزیب چیقیشینی آلدینی آلیشگه قرهتیلگن اورینیشلری دایرهسیده بهالهماقده. اولر نینگ فکریچه، سمارت فونلر علاقه واسطهسی بۉلیش بیلن بیرگه، معلوماتلرنی تېزکار قید اېتیش و اوزهتیش واسطهسیگه هم ایلنگن. شو سببلی حکومتلر انقراضلی وضعیتلرده بوندهی واسطهلر اوستیدن نظارتنی کوچهیتیریشگه حرکت قیلهدی.
بوندن تشقری، سۉنگی آیلردهگی خوفسیزلیک بیلن باغلیق واقعهلر هم بوندهی قرار قبول قیلینیشیده رۉل اۉینهگن بۉلیشی ممکن. بدهخشان نینگ اَیریم حدودلریده یوز بېرگن خلق ناراضیلیکلری، شمالي منطقهلرده ناراضیلیک کیفیتی نینگ کوچهییشی همده طالبان نینگ اَیریم قۉشنی دولتلر بیلن دوام اېتهیاتگن ترنگ مناسبتلری اوشبو گروه نینگ خوفسیزلیککه عاید خواطرلرینی آشیرگن.
خبردار منبعلر نینگ اَیریملری اېسه طالبان عملدارلری آرهسیده اخبارات سیزیب چیقیشی و مخفي حکومت معلوماتلری نینگ آشکار بۉلیشی احتمالی یوزهسیدن جدّي خواطرلر موجودلیگینی تأکیدلهماقده. اولر نینگ فکریچه، سمارت فونلردن فایدهلنیشنی چېکلش طالبان نینگ معلوماتلر سیزیب چیقیشی خوفینی کمهیتیریش و ایچکی علاقهلرنی نظارت آستیگه آلیش استراتیژيسی نینگ بیر قِسمی بۉلیشی ممکن. بیراق، طالبان حاضرگچه اوشبو قرار نینگ اساسي سببلری یوزهسیدن رسمي و باتفصیل ایضاح بېرمهگن.
سۉنگی ییللرده طالبان عامهوي اخبارات واسطهلری، اجتماعي ترماقلر و اخباراتگه اېریشیش امکانیتلریگه نسبتاً بیر نېچه بار چېکلاولر جاري اېتگن. شو سببلی، اَیریم مېدیا فعاللری و انسان حقوقلری حمایهچیلری ینگی فرماننی اوشبو گروه نینگ اخبارات اېرکین ایلنیشینی چېکلشگه قرهتیلگن سیاستی نینگ دوامی صفتیده بهالهماقده.
شونگه قرهمهی، طالبان اوشبو تعقیقنی قَی درجهده تۉلیق عملگه آشیره آلیشی حاضرچه انیق اېمس. سمارت فونلر سۉنگی ییللرده کوندهلیک حیات و مأموري فعالیت نینگ اجرهلمس قِسمیگه ایلنگن. شو باعث بوندهی کۉرسهتمنی تۉلیق اجرا اېتیش کۉپلب عملي قیینچیلیکلرگه دوچ کېلیشی ممکن.
انیق بۉلگن جهت شوکی، طالبان نینگ ینگی فرمانی عادي مأموري قرار بۉلیب کۉرینمهیدی. عکسینچه، او گروه نینگ خوفسیزلیککه عاید خواطرلری، اخبارات اوستیدن نظارتنی کوچهیتیریشگه بۉلگن اینتیلیشی همده افغانستان ایچیده و تشقریسیده دوچ کېلهیاتگن معمالرنی باشقریشگه قرهتیلگن سعی-حرکتلری نینگ عکس-صداسی صفتیده بهالنماقده.
