افغانستان ژورنالیستلر مرکزی طالبلرنینگ دولت ادارهلریده سمارت فونلردن فایدهلنیشنی چېکلاو قرارینی «سۉز اېرکینلیگی و اخباراتگه کیریشنی نظارت قیلیش سیاستی نینگ دوامی» دېب بهالب، اونی کېسکین قارهلهدی.
مرکز بوگون (چهارشنبه، ۲۷جوزا) اعلان قیلگن بیاناتیده اوشبو قرارنینگ سلبي عاقبتلریدن بیری ژورنالیستلرنینگ اخبارات آلیش امکانیتلرینی ینه-ده چېکلشی اېکنینی تأکیدلهدی. بیاناتده قید اېتیلیشیچه، اوّل هم تورلی کۉرسهتمهلر، خصوصاً، جانلی موجوداتلر تصویرلرینی اعلان قیلیش و ویدیولرنی تعقیقلش آرقهلی اخباراتگه اېریشیش امکانیتی سېزیلرلی درجهده چېکلنگن اېدی.
مرکز نینگ فکریچه، تکنالوژي و صنعي رواجلنگن دوریده بوندهی چارهلر آرتگه قَیتیش نینگ اېنگ یوقاری کۉرینیشی دیر.
تشکیلات قرار نینگ اخبارات آلیش جریانیگه تأثیری حقیده هم تۉختهلیب، خوست ولایتیدهگی محلي ژورنالیست سۉزلرینی کېلتیرگن. اونینگ ایتیشیچه، سمارت فونلردن فایدهلنیش تعقیقلنگچ، ایلگری واتسپ گروهلری آرقهلی ترقهتیب کېلینگن دولت ادارهلری نینگ نظارت آستیدهگی اخباراتلری هم تۉختهب قالگن.
شونینگدېک، باختر اخبارات اگېنتلیگی نینگ بیر ژورنالیستی مرکزگه معلوم قیلیشیچه، خبرگزارلیک باشلیغی هدایت الله هدایت 20 جوزا کونی واتسپ گروهیده خبر یوباریب، ولایتلردهگی ژورنالیستلردن سمارت فون تعقیقی عملگه آشیریلگن تقدیرده الکترون پُسته آرقهلی ایشلشنی سۉرهگن.
افغانستان ژورنالیستلر مرکزی طالباننی جاري اېتیلگن چېکلاولرنی قَیته کۉریب چیقیشگه، فقرالر نینگ اساسي حقوق و اېرکینلیکلریگه همده اخبارات آلیش حقوقیگه حرمت بیلن یاندهشیشگه چقیرگن.
یقینده هبت الله آخوندزاده آغزهکی فرمان چیقریب، دولت خدمتچیلری و طالبان کوچلری اوچون سمارت فونلردن فایدهلنیشنی تعقیقلهگن همده قاعدهنی بوزگنلرنی حربي محکمهگه تاپشیریش حقیده کۉرسهتمه بېرگن.
اوشبو بویروقدن سۉنگ طالبان نینگ تورلی ولایتلردهگی ادارهلری اونی عملگه آشیریشنی باشلهدی. اولر دولت خدمتچیلریگه نهفقط ایش وقتیده، بلکه ایش وقتیدن تشقریده هم سمارت فونلردن فایدهلنیش تعقیقلنیشینی معلوم قیلگن.
