گزارشگر: اسلامالدین جرأت
نماز عصرگه یقینلشگنده اونی کۉردیم. پشاورنینگ حیات آباد منطقهسیدهگی بشارت مارکیت قویاش تیغیده یانردی. ایسّیق فقط آسماندن توشمهیاتگن اېدی؛ اسفالت نینگ اۉزیدن هم حرارت کۉتریلیب تورردی. بیر نېچه دوکاندار دېوارلر سایهسیده اۉتیرردی. موترلر بازار ایچیدن سېکین حرکتلنیب اۉتر اېدی.
احمد احمدی سایبان آستیده تورردی.
تېمیر ارابهچهگه بیر نېچه کتّه موز بۉلهکلری تېریب قۉییلگن اېدی. اولر نینگ چېکّهلریدن سوو تامچیلب، اسفالت اوستیده آقیب بارر و تاشلر آرهسیدهگی یاریقلرده یۉقالیب کېتردی. خریداری بار اېدی. ایش بیلن بند اېدی. مېن موز ساتیب آلیش اوچون بارگن اېدیم. نگاهلریمیز تۉقنهشگنده، مېن بیرار نرسه سۉرهشیمدن آلدین فارس تیلیده دېدی:
پاکستانده قنچه وقتدن بېری یشهیهپسن؟
ارابهچه یانیده تۉختهدیم. ینه بیر مشتری کېلدی. احمد موزدن بیر بۉلک کېسیب بېردی، پولنی آلدی و ینه مېنگه یوزلندی.
اونینگ اسمی احمد احمدی. وردک ولایتیدن. اما عمری نینگ کتّه قِسمینی کابلده اۉتکزگن. شو قدَر کۉپکی، حیاتی حقیده گپیرگنده توغیلیب اۉسگن قیشلاغیدن کۉره کابل نینگ محلهلری نامینی کۉپراق اېسلهیدی.
احمد ییللر دوامیده خلق ارا تشکیلاتلردن بیری نینگ آشخانهسیده ایشلهگن. دایمي معاشی بار اېدی. حیاتی دبدبهلی بۉلمهگن، اما اېرتنگی کونی قندهی بۉلیشینی بیلردی. اۉشه ییللرنی اېسلهگنده بیر گپنی قیته-قیته تکرارلهیدی:
– آدم اېرتهگه نیمه بۉلیشینی بیلردی.
2021-ییلدن کېین اېسه اۉشه حیات توگهدی. ییللر دوامیده وردک تومنلریده یشهگن قرینداشلری کابلگه کۉچیب کېلیشدی. احمدنینگ ایش تجربهسی اېندی باشقه معنا کسب اېتگن اېدی.
اونینگ ایتیشیچه، نه وردککه قَیتیش یۉلی بار، نه کابلگه.
شوندن سۉنگ پاکستانگه کېلدی. اونگه کوتیش کېرهکلیگینی ایتیشدی. حجتلری کۉریب چیقیلیشینی ایتیشدی. پی-2 دستوری اونی باشقه مملکتگه کۉچیریش اوچون امکانیت بۉلیشی کېرهک اېدی.
اما تۉرت ییل اۉتدی.
بو ییللرنینگ کۉپ قِسمینی راولپیندیده اۉتکزدی. اجارهدهگی خانهلرده و کوندن-کونگه کمهییب بارهیاتگن جمغرمهسی بیلن. آلتی آی آلدین افغان مهاجرلرینی دېپورت قیلیش جریانی کوچهیگچ، پشاورگه کۉچدی. حاضر شاکس محلهسیده یشهیدی: بیر خانه، بیر یۉلک و مکتبگه باره آلمهیاتگن تۉرت فرزند.
هر کونی تانگده اویدن چیقهدی. موز بۉلهکلرینی ساتیب آلهدی. اولرنی ارابهچهسیگه یوکلهیدی و بشارت مارکېتگه آلیب کېلهدی. سایباننی اۉرنتهدی و مشتری کوتهدی.
اوندن سۉردیم:
– ایشلرینگ قندهی؟
قیسقه جیلمهیدی.
– یخشی. هفتهسیگه اوچ-تۉرت کون.
سۉنگ بیر لحظه سکوت قیلدی. نگاهی موزلرگه قدهلدی.
– اما هر هفته بیر-ایکّی کون پولیم اېریب کېتهدی.
بو گپنی جوده ساکن آهنگده ایتدی.
بیر نېچه دقیقهدن کېین او مېنگه هم، کۉچهگه هم اېمس، فقط موزلرگه تیکیلیب قالدی. سۉنگ بیر متاعنی آلیب، موزلر اوستیگه احتیاطکارلیک بیلن یاپدی. جوده سېکین و سینچکاولیک بیلن.
کېین دېدی:
– اۉزیم مهم اېمسمن. فرزندلریم نینگ کېلهجگی مهم.
پېشانهسیدن تېر آقیب توشردی. متاع آستیدن اېسه موزلر نینگ چېکّهلریدن سوو تامچیلری تامیب تورردی.
اونینگ پی-2 دستوری بۉییچه عریضهسی هنوز کۉریب چیقیلیشینی کوتماقده. پاکستان ویزهسی مدتی توگهگن و عملده یشش اوچون قانوني حجتی یۉق.
هر کونی اویدن حبسگه آلینیشی ممکن بۉلگن خوف بیلن چیقهدی.
سۉردیم:
– پولیسدن قۉرقیش قندهی حس؟
بیر لحظه جیم قالدی.
– هر کونی شو قۉرقوو بیلن اویغآنهمن. اما چیقمسهم، بالهلریم نیمه یېیدی؟
کېین بیر آز سکوتدن سۉنگ قۉشیب قۉیدی:
– قَیتیش نینگ علاجی یۉق. پاکستانده قالیش نینگ علاجی یۉق. امریکاگه کېتیش نینگ هم علاجی یۉق. قهیېرده و قندهی یششیمنی بیلمهیمن.
احمد یالغیز اېمس.
پشاورده کۉچیریش دستورلریگه عریضه تاپشیرگن کۉپلب افغانلر ییللر دوامیده جواب کوتماقده. اَیریم ایشلر حلی هم کۉریب چیقیلمهگن، کۉپلب عایلهلر اېسه مدتی توگهگن حجتلر بیلن یششگه مجبور.
قویاش پستلهی باشلهگن اېدی. بشارت مارکېت استه-سېکین گوجوملشیب بارردی.
احمد متاعنی ینه تۉغریلب قۉیدی و ایشیگه قَیتدی.
اوندن کابلدن اېنگ کۉپ نیمهنی اېسلشینی سۉردیم.
نگاهی اوزاققه قدهلدی.
– معاش یخشی اېدی. آدم اېرتهگه نیمه بۉلیشینی بیلردی.
سۉنگ ینه موز بۉلهکلریگه قرهدی.
متاع آستیده اېسه موز سېکین، جیمجیت و کۉزگه تشلنمهی اېریب بارردی.
اېسلتمه: اوشبو رایورتاژ احمد احمدی نینگ تۉلیق راضیلیگی بیلن یازیلگن بۉلیب، پشاورده اۉتکزیلگن بېواسطه صحبت و جاییدهگی کوزهتوولر اساسیده تیارلنگن.
