امریکانینگ افغانستان اوچون سابق مخصوص نمایندهسی زلمی خلیلزاد کابلگه سفری چاغیده طالباننینگ تشقی ایشلر وزیری سرپرستی امیرخان متقي بیلن اوچرهشیب، صحبتلشدی.
طالبان تشقی ایشلر وزیرلیگی بوگون (چهارشنبه، ۳۰ میزان) مذکور اوچرهشوو حقیده معلوم بېرگن.
بیاناتده ایتیلیشیچه: «مذکور نا رسمي اوچرهشووده افغانستان و امریکا قۉشمه ایالتلری اۉرتهسیدهگی ایکّی تامانلهمه علاقهلرنی رواجلنتیریش یۉللری یوزهسیدن کېنگ قمراولی صحبتلر بۉلیب اۉتگن.»
خلیلزاد حاضرچه کابل سفرینینگ تفصیلاتلری یاکه طالبان نمایندهلری بیلن اوچرهشووی حقیده هېچ قندهی ایضاح بېرمهگن.
طالبان حاکمیتنی قَیته اېگهلهگندن بېری بو خلیلزهد نینگ کابلگه قیلگن اوچینچی آچیق تشریفی دیر.
او بوندن اوّل ایکّی مرتبه امریکانینگ گرودهگیلر مسألهلری بۉییچه مخصوص وکلی آدام بولر بیلن بیرگه کابلگه کېلیب، بیر قطار طالبان رسمیلری بیلن اوچرهشوولر اۉتکزگن اېدی.
مذکور سفرلردن سۉنگ طالبان اۉز قماقخانهسیدن بیر نېچه امریکالیک وطنداشنی آزاد قیلگن، امریکا اېسه بیر طالبان اعضاسینی قماقدن چیقرگن همده اَیریم یوقاری مرتبهلی طالبان یېتکچیلریگه قۉییلگن پول مکافاتلرینی بېکار قیلگن اېدی.
