امریکا جمهور رییسی دونالد ترامپ و روسيه جمهور رییسی ولادیمیر پوتین اۉرتهسیدهگی رېجهلشتیریلگن اوچرهشوو، ماسکودن کېلگن تېزلیک بیلن اۉت آچیشنی تۉختهتیش حقیدهگی چقیریقدن بیر کون اۉتیب، تۉختهتیب قۉییلدی.
آق اوینینگ یوقاری مرتبهلی رسميسی «رویترزگه» یقین کېلهجکده جمهور رییس ترامپنینگ جمهور رییس پوتین بیلن اوچرهشووی رېجهلشتیریلمهگنینی بیلدیردی.
ترامپ اۉتگن هفته او و پوتین یقینده مجارستانده اوچرهشیب، اوکرایندهگی اوروشنی توگهتیش یۉللرینی محاکمه قیلیشنی ایتگن اېدی.
اما «رویترز» نینگ یازیشیچه، پوتین مُراضاتگه تیار اېمس. ماسکو اوزاق وقتدن بېری اوکرایندن اۉت آچیشنی تۉختهتیشدن آلدین ینه قۉشیمچه حدودلرنی تاپشیرسینی طلب قیلیب کېلماقده.
ترامپ ژورنالیستلرنینگ سواللریگه جوابن شوندهی دېگن: او «بېهوده اوچرهشوو» اۉتکزیشنی ایستهمهیدی، اما «کېینگی ایکّی کون ایچیده سیزنی ینگی اۉزگریشلر حقیده خبردار قیلهمیز» دېب قۉشیمچه قیلگن.
امریکانینگ ایکّی رسميسی و حالتدن خبردار بۉلگن ینه ایکّی منبعنینگ ایتیشیچه، روسيه اۉتگن هفته آخریده امریکا «غیر کاغذی» طرزیده خصوصي بیانات یوبارگن. اونده روسيه نینگ اوزاق ییللیک تینچلیک شرطلری ینه بیر بار تکرارلنگن.
بیر منصبدارنینگ سۉزلریگه کۉره، بو حجتده روسيه ینه شرقي دونباس منطقهسی نینگ تۉلیق نظارتینی طلب قیلگن و ترامپنینگ جاري مناقشه چیزیغیده اۉت آچیشنی تۉختهتیش تکلیفینی رد اېتگن.
روسيه حاضرده لوهانسک ولایتینینگ برچهسینی و قۉشنی دانېتسک ولایتی نینگ تخمیناً ۷۵ فایزینی یعنی دونباس حدودینینگ اساسي قِسمینی نظارت قیلهدی.
اروپا یېتکچیلری سهشنبه کونی واشینگتنگه مراجعت قیلیب، اوکراینده درحال اۉت آچیشنی تۉختهتیش طلبیده قطعي بۉلیشنی، و موجود جنگاور چیزیقلرنی کېلهجکدهگی هر قندهی مذاکره نینگ اساسی صفتیده قبول قیلیشنی سۉرهشگن.
ترامپ اۉتگن هفته پوتین بیلن تیلفون آرقهلی گپلشگن و اوکراین جمهور رییسی والادیمیر زلنسکي بیلن اوچرهشگن اېدی. اگست آییده آلاسکاده اۉتگن اوچرهشوو مهم نتیجه بېرمهگچ، ترامپ روسيه رهبری بیلن ینه بیر مهم اوچرهشوو اۉتکزیشگه امید قیلگن.
بیراق تامانلر پنجشنبه کونی ببوداپستده اۉتکزیلیشی کېرهک بۉلگن روبیو و لاوروف اۉرتهسیدهگی تیارگرلیک اوچرهشووینی هم کېچیکتیریشگه قرار قیلگنلر.
