هند تشقی ایشلر وزیرلیگی کابلدهگی «تخنیکی ماموریتینی» اېلچیخانه درجهسیگه کۉترگنینی اعلان قیلدی.
وزیرلیک بوگون (سهشنبه، ۲۹ میزان) ترقهتگن بیاناتیده، «بو قرار هندستاننینگ افغانستان تامان بیلن اۉز ارا منفعتلی برچه ساحهلرده همکارلیکنی چوقورلشتیریش بارهسیدهگی قطعي نیتینی نمایان اېتهدی دېب معلوم قیلگن.»
تشقی ایشلر وزیرلیگینینگ قۉشیمچه قیلیشیچه، «هند اېلچیخانهسی افغانستان جمعیتینینگ اوستوارلیکلری و آرزولریگه موافق روشده، هندنینگ افغانستان کېنگ قمراولی رواجلنیشیگه، انسانپرورلیک یاردملرگه و امکانیتنی آشیریش تشبثلریگه قۉشگن حصهسینی ینه-ده کۉپهیتیرهدی.»
بوندن ایلگری هند تشقی ایشلر وزیری سوبرامانیام جایشانکر، ینگی دهلیده طالبان تشقی ایشلر وزیری امیرخان متقي بیلن اوچرهشووده مملکتینینگ تخنیکي ماموریتی اېلچیخانه درجهسیگه کۉتریلیشینی بیلدیرگن اېدی.
هند «طالبان» نینگ افغانستانده ینه حاکمیتگه کېلگنیدن سۉنگ دستلب کابلدهگی اېلچیخانهسینی یاپگن، بیراق آرهدن آز وقت اۉتیب، تخنیکي ماموریت درجهسیده قَیته فعالیت باشلهگن اېدی.
سۉنگّی آیلر ایچیده هند پاکستان بیلن کېسکینلیک آرتیدن طالبان بیلن علاقهلرینی کوچهیتیرگن و جاري آیده طالبان تشقی ایشلر وزیری یېتّی کون دوامیده هندده مهمان بۉلگن.
