افغانستاننینگ بیرلشگن ملتلر تشکیلاتیده نمایندهلیگی سرپرستی نصیر احمد فایق سابق حربي خدمتچیلرنینگ اۉلدیریلیشی دوام اېتهیاتگنیگه مناسبت بیلدیریب، «خلق قانینینگ تۉکیلیشیگه مسوول بۉلگنلر» اېرتهمی-کېچمی عدالت آلدیده جواب بېریشینی ایتدی.
فایق بوگون (شنبه،۳۰ جوزا) ایکس اجتماعي ترماغیده نشر قیلگن بیاناتیده طالبلر سابق حربيلر و خوفسیزلیک کوچلریگه نسبتاً مناسبتیده «جنایت» صادر اېتهیاتگنینی تأکیدلهدی.
او شوندهی یازدی: «افغانستان نینگ سابق حربي و خوفسیزلیک خادملری طالبان جنایتلری همده دولت و خلقنی حمایه قیلیش اۉرنیگه شخصي منفعتلر، رقابتلر و خودبینلیک سبب تینچلیک جریانی همده سیاسي یېچیم ایزلش یۉلینی ضعیفلشتیرگن کیشیلرنینگ خیانتی قربانیگه ایلندیلر. نتیجهده مملکت و اونینگ خلقی طالبلر قۉلیگه تاپشیریلدی.»
فایقنینگ ایتیشیچه، بوگونگی کونده میلیونلب آدملر، جملهدن عیاللر، قیزلر، یاشلر همده سابق حربي و خوفسیزلیک خادملری اۉشه قرارلر و حرکتلرنینگ عاقبتلرینی باشدن کچیرماقده.
افغانستاننینگ بیرلشگن ملتلر تشکیلاتیدهگی دایمي نمایندهسی: «جنایتلر، قان تۉکیلیشی، ملي منفعتلرگه خیانت و خلق حقوقلرینینگ بوزیلیشیگه مسوول بۉلگنلر اېرتهمی-کېچمی عدالت آلدیده جواب بېرهدی»، دېدی.
او، شونینگدېک، «بو وضعیت ابدي دوام اېتمهیدی»، دېگن امیدینی هم بیلدیردی.
فایق نینگ تأکیدلشیچه، افغانستان تاریخی کۉپ باره شونی کۉرسهتگنکی، ظلم، باسیم و عدالتسیزلیک اساسیگه قوریلگن هېچ بیر توزوم اوزاق دوام اېتمهگن.
سۉنگگی ایکّی کون ایچیده دایکندی و پروان ولایتلریده ایکّی سابق حربي اۉلدیریلگنی حقیده خبر بېریلدی.
منبعلرگه کۉره، دایکندیده سابق حربي یاسیر حسینی جمعه کونی کېچقورون شهرستان تومنی نینگ القان بازاری حدودیده ایکّی قوراللی شخص تامانیدن آتیب اۉلدیریلگن. او اوّلگی حکومت اوردوسیده خدمت قیلگن و جمهوریت قولهگنیدن کېین بازارده دوکانچیلیک بیلن شغللنهیاتگن اېدی.
شونینگدېک، پروانده سابق حربي حشمتالله نینگ جسدی دفن اېتیلگنی معلوم قیلیندی. منبعلر اونینگ آلدین ۲۰۱-سېلاب قول ادروسی ترکیبیدهگی ۴-لوا نینگ ۳-تولی قوماندانی بۉلگنینی اَیتماقده.
معلوماتلرگه کۉره، حشمتالله اۉتگن هفته بېدرَک یۉقالگن، تۉرت کوندن سۉنگ اېسه اونینگ جسدی تاپیلگن. او جمعه کونی تاپیلگن و شنبه کونی دفن اېتیلگن. منبعلر اونینگ اۉلیمی شفقتسیز طرزده صادر اېتیلگنینی بیلدیرگن.
