طالبلر تشقی ایشلر وزیری امیرخان متقي بیرلشگن ملتلر تشکیلاتی باش کاتبی نینگ سیاسي مسألهلر بۉییچه اۉرینباسری رزماری دیکارلو بیلن افغانستاندهگی انسانپرورلیک یاردملری ثمرهدارلیگی حقیده صحبتلشدی.
طالبان تشقی ایشلر وزیرلیگی بوگون (پنجشنبه،۲۸ جوزا) نشر قیلگن بیاناتده، متقي و رزماری دیکارلو تیلفون آرقهلی ملاقات قیلگنی معلوم قیلینگن.
وزیرلیککه کۉره، صحبت دوامیده افغانستاندهگی محتاج اهالی اوچون انسانپرورلیک یاردملری یېتکزیلیشی و یاردم کۉرسهتیش جریانی نینگ ثمرهدارلیگی بحث قیلینگن.
بیاناتده ایتیلیشیچه، دیکرلو طالبان تامانیدن انسانپرورلیک فعالیتلری اوچون یرهتیلگن امکانیتلر و همکارلیکنی قدرلب، بونی یاردملر نینگ اۉز وقتیده و ثمرهلی یېتکزیلیشی اوچون مهم دېب بهالهگن.
طالبان تشقی ایشلر وزیرلیگینینگ معلوم قیلیشیچه، تامانلر اۉز ارا توشونیش، کانتروکتیف ملاقات و همکارلیکنی دوام اېتتیریش ضرورلیگینی تأکیدلهگن.
طالبلر تشقی ایشلر وزیری و بیرلشگن ملتلر تشکیلاتی باش کاتبی نینگ اۉرینباسری انسانپرورلیک یاردملری ثمرهدارلیگینی محاکمه قیلهیاتگن بیر پیتده، بو یاردملر سېزیلرلی درجهده قیسقرگن.
بیرلشگن ملتلر تشکیلاتینینگ معلوماتلریگه کۉره، جاري ییلده افغانستانده قشّاقلیک، ایشسیزلیک، آزیق-طعام خوفسیزلیگی نینگ یامانلشووی، قورغاقچیلیک و طبيعي آفتلر عاقبتلری همده منطقه دولتلریدن میلیونلب مهاجرلرنینگ مجبوري قَیتریلیشی سببلی قریب 22 میلیون کیشی انسانپرورلیک یاردمیگه محتاج.
مذکور وضعیتگه جواب قَیتریش اوچون بمت۱.۷میلیارد دالر مبلغ سۉرهگن، بیراق مالیوي ییل نینگ دستلبکی بېش آییده ضرور مبلغ نینگ۲۰ فایزیدن کمراغی تأمینلنگن.
اوّلراق افغانستاندهگی انسانپرورلیک یاردملری نینگ اېنگ کتّه قِسمی امریکا حکومتی یاکه امریکا تامانیدن قۉللب-قوّتلنهدیگن تشکیلاتلر تامانیدن مالیهلشتیریلردی.
بیراق امریکا جمهور رییسی دونالد ترامپ اۉتگن ییلی امریکا تشقی یاردملرینی کېسکین قیسقرتیردی. نتیجهده افغانستان بوندن جدّي ضرر کۉردی و مملکتده فعالیت یوریتهیاتگن کۉپلب خلقارا تشکیلاتلر یاپیلدی یاکه خدمتلری نینگ کتّه قِسمینی یۉقاتدی.
