امریکا عامهوي اخبارات واسطهلرینینگ خبر بېریشیچه، رحمانالله لکنوال، امریکا ملي گاردی اعضالریگه هجوم قیلیشده عیبلنیب حبسده سقلنهیاتگن افغانستان وطنداشی، ینگی عیبلاو خلاصهسیگه کۉره اۉلیم جزاسیگه حکم قیلینیشی ممکن.
آسوشیتدپرس پرس خبریگه کۉره، لکنوال ینگی عیبلاو خلاصهسیده۱۷ ته جنایت بۉییچه، جملهدن بیرینچی درجهلی قصداً قاتللیکده عیبلنماقده. اگر او اوشبو عیبلاو بۉییچه عیبدار دېب تاپیلسه، اونگه نسبتاً اۉلیم جزاسی قۉللنیشی احتمالی موجود.
خبرده ایتیلیشیچه، لکنوال سهشنبه کونی (۲۶ جوزا) واشنگتندهگی محکمه مجلسیده اوشبو عیبلاولر یوزهسیدن اشتراک اېتگن. او معلوللر ارابهچهسیده محکمهگه آلیب کېلینگن و هېچ قندهی بیانات بېرمهگن. اونینگ وکیل مدافعلریدن بیری اونینگ نامیدن عیبسیز اېکنینی معلوم قیلگن.
اوّلراق لکنوال تۉقّیزته عیبلاو بیلن یوزمه-یوز بۉلگن و شو ییل جنوری آییده هم محکمهده اۉزینی عیبسیز دېب حسابلشینی بیلدیرگن اېدی.
آسوشیتدپرس نینگ یازیشیچه، امریکا عدلیه وزیرلیگی اۉلیم جزاسینی طلب قیلیش یاکه قیلمسلیک بۉییچه یکوني قرار قبول قیلیشیدن آلدین، لکنوال نینگ حمایهچیلری پروکورورلر بیلن اوچرهشیب، اۉلیم جزاسی قۉللنمسلیگی کېرهکلیگینی اساسلاوچی دلیللرنی تقدیم اېتیشلری ممکن.
رحمانالله لکنوال ۲۰۲۵-ییل نوامبر آییده آق او یقینیده امریکا ملي گاردی اعضالریگه هجوم قیلگن. حادثه عاقبتیده ایکّی نفر حربي یرهلنگن.
هجومدن بیر کون اۉتیب،۲۰ یاشلی سارا بکستروم آلگن آغیر جراحتلری سبب وفات اېتگن. ینه بیر حربي اندرو ولف اېسه تیریک قالگن.
لکنوال ۲۰۲۱-ییلده امریکا کوچلری بیلن همکارلیک قیلگن افغانستانلیکلرنی تخلیه قیلیش دستوری آرقهلی قۉشمه شتاتلرگه کۉچیریلگن و او یېرگه جایلشتیریلگن اېدی.
(سیآیای) لکنوال افغانستان نینگ قندهار ولایتیده اوشبو تشکیلات کوچلری بیلن همکارلیک قیلگنینی تصدیقلهگن.
اونینگ نوبتدهگی محکمه مجلسی جاري ییل نینگ ۱۶-سپتامبر کونیگه بېلگیلنگن.
