افغانستاننینگ بیرلشگن ملتلر تشکیلاتیدهگی نمایندهلیگی سرپرستی نصیر احمد فایق، طالبان تامانیدن سمارت فونلردن فایدهلنیش تعقیقلنگنیگه مناسبت بیلدیریب، دنیا علم-فن، تکنالوژي و یسمه آنگ یاردمیده انسانلر حیاتینی یخشیلهیاتگن بیر پیتده طالبلر افغانستان خلقینی اېنگ عادي علاقه واسطهلری و اخباراتگه اېریشیش امکانیتیدن محروم قیلهیاتگنینی ایتدی.
فایق بوگون (چارشنبه،۲۷ جوزا) نشر قیلگن بیاناتیده شوندهی دېگن: «هېچ بیر حکومت سانسور، باسیم، حقیقتنی یشیریش و فقرالرنینگ اساسي حقوق همده اېرکینلیکلرینی چېکلش آرقهلی اوزاق یشب قالمهگن.»
اونینگ تأکیدلشیچه، افغانستان جمعیتی نینگ یرمی تعلیم آلیش، اۉقیش و ایشلش حقوقیدن محروم اېتیلگن. شونینگدېک، مکتبلر و تعلیم مرکزلریده زمانهوي فنلر همده کسبي کۉنیکمهلرنی اۉقیتیش چېکلنگن یاکه تعقیقلنگن، انساني و اسلامي اساسي اېرکینلیکلر اېسه کېنگ کۉلمده بوزیلماقده.
نصیر احمد فایق اۉز بیاناتیده ینه شوندهی یازگن: بیر خلقنی اتهیلب بیلیم، معرفت، تکنالوژي و ترقیات کاروانیدن چېتده قالدیریش، اونی قشّاقلیک، جهالت و یکّهلنیشگه محکوم اېتیش هېچ قندهی سبب یاکه بهانه بیلن آقلنیشی و کېچیریلیشی ممکن اېمس.»
یقینده هبتالله آخوندزاده آغزهکی فرمان چیقریب، دولت خدمتچیلری و طالبان کوچلریگه سمارت فونلردن فایدهلنیشنی تعقیقلهدی همده قاعدهنی بوزگنلرنی حربي محکمهگه تاپشیریش حقیده بویروق بېردی.
مذکور فرماندن سۉنگ طالبلر نینگ تورلی ولایتلردهگی ادارهلری اونی عملگه جاري اېتیشنی باشلهدی. رسمي کۉرستمهلرگه کۉره، دولت خدمتچیلریگه نهفقط ایش وقتیده، بلکه ایش وقتیدن تشقریده هم سمارت فونلردن فایدهلنیش تعقیقلنماقده.
