طالبلرنینگ چېگرهلر، قوملر و قبیلهلر وزیرلیگینینگ معلوم قیلیشیچه، بامیان ولایتینینگ پنجاب اولسواللیگیده کۉچمنچیلر (کۉچی) و محلي اهالی اۉرتهسیدهگی ماجرا مذاکره یۉلی بیلن حل اېتیلگن.
قولگه کېلگن معلوماتلرگه کۉره، سهشنبه کونی (۲۶ جوزا) قوراللنگن کۉچمنچیلر پنجاب اولسواللیگینینگ «پشته غرغری» حدودیدهگی «توبک» قیشلاغیگه باستیریب کیرگن و محلي اهالی بیلن تۉقنهشوو صادر بۉلگن. نتیجهده اوچ نفر دهقان کلتکلنیب، یرهلنگن.
طالبلر چېگرهلر، قوملر و قبیلهلر وزیرلیگی بوگون (چهارشنبه، ۲۷ جوزا) بېرگن بیاناتیده اوشبو تۉقنشووده ایکّی کیشی جراحت آلگنینی تصدیقلهگن و مخصوص هیئت یوباریلگچ، نزاع مذاکره آرقهلی برطرف اېتیلگنینی بیلدیرگن.
بیراق وزیرلیک ماجرانینگ قندهی حل قیلینگنی حقیده باتفصیل معلومات بېرمهگن. پنجاب اولسواللیگیدهگی محلي منبع نینگ «اطلاعات روز»گه ایتیشیچه، یوباریلگن هیئت کۉچمنچیلرگه امکان قدَر تېزراق چاروالری بیلن پنجابنی ترک اېتیشنی بویورگن، بیراق اولر ینه بېش کون مهلت سۉرهگن و هیئت بونگه راضی بۉلگن.
منبعگه کۉره، کۉچمنچیلر آلدینگی هفتهده هم اوچ کون مهلت سۉرهگن، اما هنوز حدودنی ترک اېتمهگن و کېینگی بېش کونده هم کېتمسلیک احتمالی بار.
شونینگدېک، منبع طالبلر پنجاب اهالیسی کۉچمنچیلرگه قرشی ییغیلیشلرینی تنقید قیلیب، بونی «کۉچمنچیلرگه قرشی حربي سفربرلیک» دېب بهالهگنینی بیلدیرگن.
منبع نینگ قۉشیمچه قیلیشیچه، طالبلر هیئاتی کۉچمنچیلر تامانیدن جراحتلنگن شخصلرگه اعتبار قرهتمهگن.
آلدینراق، 26 جوزا کونی «توبک» قیشلاغیده محمد حسین، جعفر و علیداد اسملی اوچ دهقان کۉچمنچیلر تامانیدن کلتکلنیب آغیر جراحت آلگن اېدی. منبعلرگه کۉره، اولر کۉچمنچیلرنینگ اېکین میدانلریگه چاروا حیوانلرینی کیریتیشیگه قرشیلیک قیلگن پیتده هجومگه اوچرهگن.
گواهلرنینگ ایتیشیچه، قوراللنگن کۉچمنچیلر کېینچهلیک قیشلاق اویلریگه هم باستیریب کیریب، اویلر تامان اۉق اوزگن و بیر نېچه عایلهلر اویلرینی تشلب قاچیشگه مجبور بۉلگن.
«اطلاعات روز»گه یېتیب کېلگن تصویرلرده جبرلنگن اوچ دهقان نینگ تنهسیده جراحت و کۉکریش ایزلری انیق کۉرینهدی.
۱۰ کون آلدین هم پنجاب اولسواللیگی نینگ «زرسنگ» حدودیده کۉچمنچیلر هجومی عاقبتیده بېش نفر محلي اهالی جراحت آلگن اېدی.
هر ییلی بهار موسمیده کۉچمنچیلر چاروالری بیلن افغانستان نینگ مرکزي حدودلریگه کیریب کېلهدی. طالبان حاکمیتی دوریده بو حالت اینیقسه هزاره یشهیدیگن منطقهلرده جدّي معماگه ایلنگن.
محلي اهالی اېکین میدانلری و ییلاولر ویران بۉلیشی، زۉرآورلیک و تحقیرلرگه دوچ کېلهیاتگنینی ایتهدی. سۉنگگی ییللرده بیر نېچه محلي اهالی کۉچمنچیلر هجومی عاقبتیده هلاک بۉلگن حالتلر هم قید اېتیلگن.
