طالبلر ایچکی ایشلر وزیرلیگی مطبوعات سۉزلاوچیسی عبدالمتین قانعنینگ معلوم قیلیشیچه، بوندن بویان «راست قۉل» یاکه افغانستان یۉل حرکتی تیزیمیگه ماس بۉلمهگن موترلرگه (نمبر پلیت) بېریلمهیدی.
قانع بوگون (چهارشنبه، ۲۷ جوزا) ایکس اجتماعي ترماغیده نشر قیلینگن بیر خبرنی قَیته اولشگن و کابلده ایلگری وقتینچه بېریلگن نمبر پلیت هم بېکار قیلینیشینی بیلدیرگن.
اونینگ ایتیشیچه، موتر رول تیزیمینی اۉزگرتیریش مسألهسی بیر نېچته ادارهلرده محاکمه قیلینماقده، بیراق حاضرچه یکوني قرار یۉق.
افغانستانده رسمي یۉل حرکتی قاعدهلری چپ قول موترلرگه ماسلشتیریلگن بۉلیب، ترانسپورتلر یۉل نینگ اۉنگ تامانیدن حرکتلنهدی. اما پاکستان کبی قۉشنی دولتلردن کۉپ مقدارده ایمپورت قیلینهدیگن اۉنگ قول موترلر سبب مملکتده بوندهی ترانسپورتلر هم کۉپ اوچرهیدی.
شو باعث اولر بعضاً «پاکستان رولیدهگی موترلر» دېب هم اتلهدی. طالبان اېسه یۉل حرکتی ترتیبینی «بیر خیللشتیریش» مقصدیده اولر نینگ رۉیخطدن اۉتکزیلیشینی تۉختهتگن.
سۉنگی پیتلرده کابلده «تونیس» توریدهگی اۉنگ قول اوتبوسلر نینگ 16 ته ایچکی یۉنهلیشده حرکتی هم تۉختهتیلگن اېدی. بو قرار هیداوچیلر تامانیدن تنقید قیلیندی.
ترانسپورت مسووللری اېسه بوندهی موترلر شهرده خوف توغدیریشینی، اېشیکلر یۉل تامانگه ناقولهی آچیلیشینی، هیداوچی نینگ کۉریش میدانینی چېکلشینی و کۉپلب یۉل-ترانسپورت حادثهلری عیناً شو توردهگی ترانسپورتلر بیلن باغلیقلیگینی تأکیدلشگن.
