کانادانینگ تورانتو شهریده یشاوچی بیر قطار افغانستانلیک مهاجرلر ناراضیلیک ییغیلیشی اۉتکزیب، خلقارا همجعيتدن افغانستاندهگی «جنسی آپارتاید» و «هزارهلر نسلکشلیگی»نی رسماً تن آلیشنی طلب قیلدی.
تیناوون (یکشنبه،۲۴ جوزا) بۉلیب اۉتگن اوشبو نمایشده قتنشچیلر افغانستان عیاللری و قیزلری، اینیقسه هراتدهگی عیاللر بیلن همجهت اېکنلیکلرینی بیلدیردیلر. اولر هراتده نمایشچیلرنی باستیریشنی قارهلب، افغانستانده انسان حقوقلرینینگ کېنگ کۉلمده بوزیلیشی، تیزیملی ظلم و جنسی آپارتایدگه قرشی ناراضیلیکلرینی اظهار قیلدیلر.
نمایشچیلرنینگ تأکیدلشیچه، افغانستان بوگونگی کونده چوقور انسان حقوقلری بحراننی باشدن کچیرماقده. بو بحران نتیجهسیده عیاللر و قیزلر تعلیم آلیش، ایشلش، اېرکین حرکتلنیش، اجتماعي حیاتده اشتراک اېتیش و جماعت میدانلریده فعال بۉلیش کبی اېنگ اساسي حقوقلریدن محروم اېتیلگن.
نمایش یکونیده قبول قیلینگن قطعنامهده بو حالت انسان حقوقلری تمایللری نینگ آچیقدن-آچیق بوزیلیشی و جمعیت نینگ یرمیسینی اجتماعي حیاتدن سیقیب چیقریشگه قرهتیلگن تیزیملی اورینیش صفتیده بهالنگن.
قتنشچیلر افغانستان عیاللرینی اساسي انساني حقوقلریدن محروم قیلهیاتگن عیاللرگه قرشی و کمسیتووچی سیاستلرنی کېسکین قارهلب، افغانستاندهگی عیاللرگه نسبتاً جنسی آپارتایدنی خلقارا حقوق دایرهسیده انسانیتگه قرشی جنایت صفتیده تن آلیشگه چقیردیلر.
شونینگدېک، اولر افغانستاندهگی قیزلر و عیاللر اوچون مکتبلر، بیلیم یورتلری همده برچه تعلیم مؤسسهلرینی زودلیک بیلن قَیته آچیشنی، اولرگه تېنگ حقوقلرنی تأمینلشنی طلب قیلدیلر. نمایشچیلرگه کۉره، تعلیم آلیش، ایشلش، سۉز اېرکینلیگی، اېرکین حرکتلنیش و اجتماعي حیاتده قتنهشیش برچه انسانلر نینگ اجرهلمس حقوقلریدیر.
نمایش اشتراکچیلری پنجشیر و اندراب کبی حدودلرده کوزهتیلهیاتگن تیزیملی کمسیتیشلر، مقصدلی زۉرآورلیکلر، یېرلرنی تارتیب آلیش و حربي باسیملردن، شونینگدېک هزاره جماعهسیگه قرشی تعلیم و دیني مسکنلرده عملگه آشیریلهیاتگن قانلی همده تیزیملی هجوملردن چوقور خواطر بیلدیردیلر.
اولر خلقارا همجعيت و انسان حقوقلری تشکیلاتلرینی «هزارهنسلکشلیگی»نی تن آلیشگه و اونی تۉختهتیش اوچون زودلیک بیلن عملي چارهلر کۉریشگه چقیردیلر.
نمایشچیلر «انسان حقوقلری، عدالت و تېنگلیکنی تأمینلش اوچون اوشبو ظلملرگه قرشی کورهشیش و اولرگه قرشی قطعي توریش حیاتي همده بنیادي ضرورتدیر»، دېب تأکیدلهدیلر.
ییغیلیش قتنشچیلری امریکا قۉشمه ایالتلری، کاناده حکومتی، دېموکراتیک دولتلر و انسان حقوقلری تشکیلاتلرینی افغانستاندهگی وضعیتگه نسبتاً سکوت سقلهمسلیککه چقیریب، عملي چارهلر، ثمرهلی دیپلوماتیک باسیملر، جوابگرلیک میکانیزملری، جنایتلرنی حجتلشتیریش و قربانلرنی بېواسطه قۉللب-قوّتلشنی طلب قیلدیلر.
اۉتگن هفته طالبلر چېکلاولرنی کوچهیتیریب، افغانستان غربیدهگی هرات ولایتیده اۉنلب عیاللرنی اوشبو گروه بېلگیلهگن کيینیش قاعدهلریگه رعایه قیلمهگنلیکده عیبلب حبسگه آلدی.
شوندن سۉنگ هراتنینگ جبریل منطقهسیده بیر گروه محلي اهالی ناراضیلیک نمایشی اویوشتیردی. بیراق طالبان بو نمایشنی تېز آرهده کوچ بیلن باستیردی. بیرلشگن ملتلر تشکیلاتی معلوماتلریگه کۉره، نمایشنی ترقهتیش چاغیده کمیده بیر کیشی هلاک بۉلگن، ینه بیر نېچه کیشی یرهلنگن.
هراتدهگی ناراضیلیکلر نینگ باستیریلیشی کېنگ خلقارا عکس-صدا بېردی. سۉنگی کونلرده تورلی مملکتلرده یشهیاتگن افغانستان مهاجرلری ناراضیلیک ییغیلیشلری اۉتکزیب، هرات نمایشچیلرینی قۉللب-قوّتلشلرینی بیلدیرگن همده عیاللرنینگ حبسگه آلینیشی و تعقیب قیلینیشینی تۉختهتیش، اولرنینگ اساسي حقوقلرینی تأمینلشنی طلب قیلگنلر.
