محرّم آیینینگ بیرینچی اۉن کونلیگی یقینلشر اېکن، افغانستان شیعه علمالری کېنگشی بیانات بېریب، طالبلرنینگ خوفسیزلیک مسووللری محرّم و عاشورا مراسملرینی خوفسیز همده اېرکین اۉتکزیش اوچون ضرور شرایط یرهتیشلری کېرهکلیگینی بیلدیردی.
کېنگشنینگ بوگون (دوشنبه، ۲۵ جوزا) نشر قیلینگن بیاناتیده طالبلردن «برچه یشاوچیلرنینگ دیني و مذهبي حقوقلریگه حرمت بیلن قرهش» طلب قیلینگن.
طالبلر سۉنگی ییللرده شیعهلرنینگ محرّم آیی ماتم مراسملریگه تورلی چېکلاولر جاري اېتگن اېدی.
اۉتگن ییللرده بو مراسملر خوفسیزلیک تهدیدلری بیلن هم یوزمه-یوز بۉلیب، بیر نېچه بار قانلی هجوملر نشانیگه ایلنگن. افغانستاندهگی شیعهلرگه قرشی اویوشتیریلگن هجوملرنینگ اکثریتی اوچون داعش جوابگرلیکنی اۉز ذمّهسیگه آلگن.
بیاناتده شوندهی دېییلهدی: «مملکت خوفسیزلیک مسووللریدن محرّم و عاشورا مراسملرینی خوفسیز و مناسب طرزده اۉتکزیش اوچون شرایط یرهتیش همده برچه فقرالرنینگ دیني و مذهبي حقوقلرینی انابتگه آلیشلری کوتیلهدی.»
کېنگش ماتم مراسملری تشکیلاتچیلری و هیئتلریدن هم طالبان خوفسیزلیک کوچلری بیلن تۉلیق همکارلیک قیلیشنی سۉرب، مراسملر تینچ، خوفسیز و چېکلاولرسیز محیطده اۉتکزیلیشی لازملیگینی تأکیدلهدی.
شونینگدېک، کېنگش مراسملرده سۉزگه چیقهدیگن خطیبلر، واعظلر و رۉزهخوانلردن مملکت مسلمانلری اۉرتهسیده نزاع و تفاوت کېلتیریب چیقریشی ممکن بۉلگن موضوعلرنی تیلگه آلمهسلیکنی سۉرهدی.
بیاناتده: «خطیبلر، واعظلر و رۉزهخوانلردن یاشلرنی عاشورانینگ حقیقي مقصد و خبرلری، یعنی عدالتپرورلیک، مسوولیت حسسی و اسلامي قدریتلرنی حمایه قیلیش روحیده تربیهلشلرینی همده مسلمان اهالی اۉرتهسیده اختلاف کېلتیریب چیقرهدیگن هر قندهی گپ-سۉزلردن تيیلیشلرینی سۉرهیمیز»، دېییلهدی.
طالبان سۉنگی بېش ییل دوامیده شیعه جماعهسیگه نسبتاً قطار چېکلاولرنی جاري قیلگن.
بو گروه افغانستان تعلیم تیزیمیدن جعفري مذهبی نینگ رسمي مقامینی، شیعهلرنینگ شخصي احوال تۉغریسیدهگی قانونینی و جعفري فیقهگه عاید درسلرنی آلیب تشلهگن.
شونینگدېک، جاري اۉقوو ییلیده اَیریم بیلیم یورتلرده تحصیل آلهیاتگن شیعه طلبهلری اۉقیشنی دوام اېتتیریش اوچون «حنفي مذهبیگه عمل قیلیش» حقیدهگی مجبوريت نامهنی امضالشگه مجبور بۉلگنی حقیده خبرلر ترقهلگن.
