آلماننینگ فرانکفورت شهریده بیر گروه افغانستانلیکلر طالبان تامانیدن هراتده عیاللرنی حبسگه آلیش و نمایشچیلرنی زۉروانلیک بیلن باستیریشگه قرشی ناراضیلیک نمایشی اۉتکزدی.
بوگون (یکشنبه، ۲۴ جوزا) بۉلیب اۉتگن نمایشده اشتراکچیلر عیاللرنینگ حبسگه آلینیشی همده طالبان نینگ هراتدهگی نمایشچیلرگه نسبتاً کوچ ایشلهتیشینی قارهلب، عیاللر حقوقلری نینگ بوزیلیشی بیلن باغلیق برچه حالتلر یوزهسیدن مستقل و خلقارا تېرگاو اۉتکزیلیشینی طلب قیلدیلر.
نمایشچیلرنینگ تأکیدلشیچه، تۉرت ییلدن آرتیق وقت دوامیده افغانستان عیاللری تعلیم آلیش، ایشلش، سیاسي و اجتماعي حیاتده اشتراک اېتیش، اېرکین حرکتلنیش و باشقه اساسي حقوقلردن محروم اېتیلگن.
اولر نینگ فکریچه، بو تیزیملی و اویوشگن چېکلاولر انسان حقوقلری نینگ آچیق بوزیلیشی همده جنسی آپارتاید نینگ یقّال کۉرینیشی دیر.
نمایش اشتراکچیلری افغانستاندهگی جنسی آپارتاید رسماً تن آلیشنی، انسان حقوقلری و عیاللر حقوقلرینی بوزگنلرنی جوابگرلیککه تارتیشنی همده افغانستان عیاللرینی عملي و ثمرهلی قۉللب-قوّتلشنی طلب قیلدیلر.
سۉنگی هفتهلرده طالبان نینگ «امر به معروف و نهی از منکر» ادارهسی عیاللر و قیزلرنینگ کيینیشیگه قۉییلگن چېکلاولرنی کوچهیتیریب، هرات شهری نینگ تورلی حدودلریده اۉنلب عیال و قیزلرنی اۉزلری بېلگیلهگن کيینیش قاعدهلریگه رعایه قیلمهگنلیک عیبی بیلن حبسگه آلگن.
شوندن سۉنگ هرات نینگ جبریل منطقهسیده یشاوچی فقرالر ناراضیلیک نمایشلری اویوشتیریب، حبسگه آلینگن عیاللرنی آزاد اېتیشنی طلب قیلگن. بیراق طالبان بو نمایشلرنی اۉق اوزیش و تیاقلردن فایدهلنیش آرقهلی تېزده ترقهتیب یوبارگن.
بیرلشگن ملتلر تشکیلاتینینگ افغانستاندهگی نمایندهلیگی (یوناما) معلوماتلریگه کۉره، هراتدهگی نمایشچیلر تامان اۉق اوزیلیشی عاقبتیده کمیده بیر کیشی اۉلدیریلگن و ینه بیر نېچه کیشی یرهلنگن. تشکیلات ینه بیر کیشی نینگ اۉلیمی حقیدهگی خبرلرنی هم اۉرگنهیاتگنینی بیلدیرگن. سۉنگی کونلرده دنیا نینگ تورلی شهرلریده یشهیاتگن افغانستان مهاجرلری هم هراتده عیاللر حبسگه آلینیشی و نمایشچیلرنینگ باستیریلیشیگه قرشی ناراضیلیک نمایشلرینی اۉتکزیب، طالبلر حرکتلرینی قارهلهماقده.
