طالبلرنینگ خوست ولایتی امنیه قوماندانلیگینینګ معلوم قیلیشیچه، اوشبو ولایتنینگ باک اولسواللیگیده اوی تامی نینگ قولهب توشیشی عاقبتیده بیر عایله نینگ۴ اعضاسی اۉلگن، ینه بیر اعضاسی یرهلنگن.
قوماندانلیک بیاناتیگه کۉره، حادثه بوگون (یکشنبه،۲۴ جوزا) ساعت تخمیناً۸:۰۰ده باک اولسواللیگینینگ «مانه» قیشلاغیده صادر بۉلگن.
هلاک بۉلگنلر عایله آتهسی، آنهسی، اولر نینگ۷ یاشلی اۉغلی و۲ یاشلی قیزیدن عبارت اېکنی بیلدیریلگن.
شونینگدېک، حادثه عاقبتیده عایله نینگ۸ یاشلی اۉغلی هم یرهلنگن.
طالبلر امنیه قوماندانلیگی دستلبکی سوریشتیروولر نتیجهسیگه کۉره، اوی تامی «طبيعي سببلر» طفیلی قولهب توشگنینی معلوم قیلگن.
جاري ییل دوامیده کوچلی یاغینگرچیلیکلر سبب افغانستان نینگ تورلی ولایتلریده اوی تاملری قولهب توشیشی بیلن باغلیق کۉپلب حادثهلر قید اېتیلگن. بو حادثهلرده بیر نېچه کیشی هلاک بۉلگن و یرهلنگن.
