طالبلرنینگ غزنی ولایتی امنیه قوماندانلیگی مطبوعات سۉزلاوچیسی ابو خالد سرحدي نینگ معلوم قیلیشیچه، اوشبو ولایت مرکزیده «۵۸۰» روسوملی یۉلاوچی اتوبوسی بیلن «تیلر» توریدهگی یوک موتری تۉقنهشیب کېتیشی عاقبتیده۲ کیشی هلاک بۉلگن، ینه۲۹ کیشی یرهلنگن.
حادثه شنبه کېچهسی(۲۳جوزا) ساعت تخمیناً۱۰:۰۰ ده کابل–قندهارنینگ غزنی ولایتی مرکزیگه قرهشلی «کوتل روضه» منطقهده یوز بېرگن.
غزنی رادیو تلویزیونی بوگون تانگده ابو خالد سرحديگه تهیهنیب خبر بېریشیچه، حادثه عاقبتیده۲ کیشی وفات اېتگن،۲۹ کیشی، جملهدن 11 نفر عیال تن جراحتی آلگن.
اونینگ ایتیشیچه، واقعه صادر بۉلگنیدن بیر نېچه دقیقه اۉتیب تېز یاردم موترلری حادثه جاییگه یېتیب بارگن و برچه جراحتلنگنلر دوالنیش اوچون غزنی ولایت همده منطقوي شفاخانهلریگه آلیب کېتیلگن.
سرحدي نینگ سۉزلریگه کۉره، داکترلر یرهلنگنلرنینگ۸ کیشیسی احوالینی آغیر دېب بهالهگن.
غزنی ترافیک ادارهسی خادملری حادثه جایینی اۉرگنیب چیقیب، واقعهنینگ احتمالي سببی صفتیده تونگی قارانغیلیک و هیداوچیلر نینگ احتیاطسیزلیگینی کۉرسهتگن.
کابل–قندهار عمومی قتناو یۉلی اینیقسه ۵۸۰ روسوملی یۉلاوچی اتوبوسلری اشتراکیدهگی ترافیک حادثهلری هر ییلی اۉنلب مراتهبه صادر بۉلماقده.
یۉل حرکتی متصدیلری اکثریت حاللرده بوندهی حادثهلرگه یوقاری تېزلیک و یۉل حرکتی قاعدهلریگه رعایه قیلینمسلیگی سبب بۉلهیاتگنینی تأکیدلهیدی.
طالبلر اۉتگن ییلی اوشبو اتوبوسلر تېزلیگینی نظارت قیلیش مقصدیده اولرگه جیپیاس قوریلمهلری اۉرنهتیلگنینی همده ترانسپورت واسطهلری نینگ حرکت و منزلگه یېتیب باریش وقتلرینی کوزهتیب بارهیاتگنینی معلوم قیلگن اېدی.
بیراق یۉلاوچیلر بو تیزیملر اۉرنهتیلگنی بیلن اتوبوسلر تېزلیگیده هېچ قندهی اۉزگریش بۉلمهگنیدن شکایت قیلماقده.
