کنر ولایتیدهگی محلي منبعلر نامعلوم شخصلر تامانیدن سکّیز یاشلی قیزهلاق اوشبو ولایت نینگ نرنگ اولسواللیگیده سِرلی طرزده اۉلدیریلگنینی معلوم قیلدی.
بیر منبع نینگ معلوم قیلیشیچه، قیزهلاق نینگ اسمی سایره بۉلیب، او پنجشنبه کونی (۲۱جوزا) نرنگ اولسواللیگی نینگ دبرنگ منطقهسیده اۉلدیریلگن.
منبعنینگ قۉشیمچه قیلیشیچه، سایره اوچینچی صنف اۉقووچیسی بۉلگن و واقعهدن بیر نېچه کون آلدین تعطیلنی اۉتکزیش اوچون عمکیسی نینگ دبرنگدهگی اوییگه بارگن اېدی.
معلوماتلرگه کۉره، سایره عمکیسی نینگ اوییدن بېدرَک یۉقالگن و آرهدن بیر نېچه کون اۉتیب محلي اهالی اونینگ جسدینی تاپگن.
سایره نینگ عایله اعضالری هېچ کیم بیلن شخصي عداوتی یۉقلیگینی بیلدیریب، بو جنایتنی کیم و قندهی مقصدده صادر اېتگنینی بیلمسلیکلرینی ایتگن.
شو بیلن بیرگه، طالباننینگ کنر ولایتی نرنگ اولسواللگیدهگی امنیه قوماندانلیگی واقعه صادر بۉلگنینی تصدیقلب، اوشبو قاتللیککه علاقهدارلیکده گمان قیلینهیاتگن بیر کیشینی حبسگه آلگنینی معلوم قیلدی.
طالبان رسمیلرینینگ ایتیشیچه، قۉلگه آلینگن شخص دستلبکی تېرگاو ایشلری یکونلنگچ، محکمه اۉرگانلریگه تاپشیریلهدی.
طالبان حاکمیتگه قَیتگنیدن بویان سۉنگّی بېش ییل ایچیده مملکتده سِرلی قاتللیکلر حقیده خبرلر کۉپهیگن. کۉپلب حاللرده بوندهی حادثهلرنینگ اجراچیلری و اولرنینگ کیملیگی جماعتچیلیککه آشکار قیلینمهیدی.
