قندوز ولایتیده یوز بېرگن ترافیک حادثهسی عاقبتیده بېش کیشی جان بېرگن، ینه ایکّی کیشی یرهلنگن.
طالبلر نظراتی آستیدهگی ملي تلویزیونینینگ خبر بېریشیچه، حادثه جمعه کونی (۲۲ جوزا) قندوز شهری بیلن امام صاحب اولسواللیگی اۉرتهسیدهگی «دشتی آبدان» منطقهسیده صادر بۉلگن.
محلي منبعلر نینگ معلوم قیلیشیچه، حادثه «کرولا» روسوملی موتر بیلن «اکوا» روسوملی موتر تۉقنهشووی نتیجهسیده یوز بېرگن. تۉقنهشوودن سۉنگ موترلردن بیری یانیب کېتگن.
منبعلرگه کۉره، هلاک بۉلگنلرنینگ برچهسی قندوز ولایتی نینگ امام صاحب اولسواللیگی اهالیسی بۉلگن یاشلردن عبارت.
حادثهنینگ انیق سببی حاضرچه معلوم قیلینمهگن. بیراق مملکتده کوزهتیلهیاتگن شونگه اۉخشش کۉپلب ترافیک حادثهلریده یوقاری تېزلیک و هیداوچیلرنینگ احتیاطسیزلیگی اساسي عامللر صفتیده قید اېتیلهدی.
