بیرلشگن ملتلر تشکیلاتینینگ افغانستاندهگی یاردم ادارهسی (یوناما) «بوتون جهان بالهلر ایشیگه قرشی کورهش کونی» مناسبتی بیلن اعلان قیلگن بیاناتیده، اینیقسه تعلیمدن محروم قیلینگن قیزلر ضررلی ایشگه و استثمارگه کۉپراق دچار بۉلهیاتگنینی تأکیدلهدی.
بوگون، جمعه کونی (۲۲-جوزا)، «بوتون جهان بالهلر ایشیگه قرشی کورهش کونی» نشانلنماقده. بو ییل مذکور سنه «بالهلر ایشیگه قیزیل کرتوچکه(کارت): بالهلر اوچون عدالتلی اۉیین، کتّهلر اوچون مناسب ایش» شعاری آستیده اۉتکزیلماقده.
یوناما شو مناسبت بیلن نشر قیلگن خبریده افغانستان بۉیلب بالهلر کۉچهلرده، بازارلرده، دلهلرده، کانلرده و اوستاخانهلرده «آغیر و خوفلی ایشلرده» محنت قیلهیاتگنینی بیلدیردی.
تشکیلات بالهلر «اۉرگنیش، اۉینش و خوفسیز همده ساغلام محیطده اولغهییش امکانیتیگه اېگه بۉلیشی کېرهک»لیگینی قید اېتدی.
بیرلشگن ملتلر تشکیلاتی وکالتخانهسی شوندهی دېدی: «بالهلر، اینیقسه قیزلر تعلیمدن محروم اېتیلگنده، اولر اېرته یاشدهگی، ضررلی ایشگه کۉپراق دچار بۉلهدیلر.»
یونامانینگ قۉشیمچه قیلیشیچه، طالباننینگ عیاللر ایشیگه قۉیگن چېکلاولری کۉپلب عایلهلرنی اقتصادي احتیاجلرینی قاپلش اوچون بالهلر محنتیگه تهیهنیشگه مجبور قیلماقده.
تشکیلات بالهلر اۉینش، تعلیم آلیش و استثمار، زۉروانلیک همده تورلی ضررلی تأثیرلردن حمایهلنیش اوچون تېنگ امکانیتلرگه لایق اېکنینی تأکیدلهدی.
افغانستاندهگی بالهلر احوالی دایما آغیر اېکنی قید اېتیب کېلینهدی.
بیرلشگن ملتلر تشکیلاتی بیلن همکار تشکیلاتلر معلوماتلریگه کۉره، ۲۰۲۵-ییلده طالبان سیاستی سببلی۲.۲میلیوندن آرتیق قیز باله تعلیم آلیش امکانیتیدن محروم بۉلگن. شونینگدېک، قشّاقلیک نینگ کوچهییشی نتیجهسیده بیر میلیوندن آرتیق باله آغیر محنتگه جلب اېتیلگن،۳.۵ میلیوندن زیاد بېش یاشگچه بۉلگن بالهلر اېسه آچلیک و آزیق-طعام خوفسیزلیگی نینگ یېتیشمسلیگی عاقبتیده تۉییب طعاملنمسلیک (ناتۉغری طعاملنیش) معماسیگه دوچ کېلگن.
بیرلشگن ملتلر تشکیلاتی معلوماتیگه کۉره، دنیا بۉییچه۱۳۸ میلیون باله (۷۸میلیون اۉغیل باله و۵۹میلیون قیز باله) ایش قیلماقده. اولر نینگ۵۴ میلیون نفری آغیر و خوفلی ایشلرده بند.
