طالبلر ینه هرات اهالیسینینگ عیاللر و قیزلرنینگ حبسگه آلینیشیگه قرشی کۉچهگه چیققن نمایشینی اۉق اوزیش آرقهلی باستیردی.
یوزلب قوراللی حربيلرنینگ خلق ناراضیلیگینی آلدینی آلیش اوچون سفربر اېتیلگنیگه قرهمهی، بوگون (جمعه، ۲۲-جوزا) توشدن کېین هم بیر گروه هرات اهالیسی شهر مرکزیده ناراضیلیک نمایشی اۉتکزدی.
ترقهلگن ویدېولرده نمایشچیلر (عیال، حیات، آزادلیک)، «دیکتاتورگه اۉلیم» همده عیاللر اوچون «تعلیم حقوقی، ایش حقوقی» کبی شعارلرنی ینگرهیاتگنی کۉرینهدی.
عینِ پیتده طالبلر کوچلرینینگ اۉق اوزهیاتگن آوازلری هم اېشیتیلهدی.
ینه بیر قیسقه ویدېوده اۉق آوازلری ینگرهگچ، آدملرنینگ تورلی تامانگه قاچهیاتگنی عکس اېتگن.
بو یشاوچیلر هرات دېیرلی تۉلیق حربي محیطگه ایلنتیریلگنیگه قرهمهی، شهر مرکزیگه یېتیب کېلیب، ناراضیلیک نمایشی اۉتکزیشگه موفق بۉلیشگن.
طالبلر شهرنینگ تورلی نقطهلریده، اینیقسه مرکزي حدودلرده، یېنگیل قوراللر، راکتلر و حتا تانکلر بیلن جهازلنگن یوزلب حربيلرنی جایلشتیریب، هر بیر یۉنهلیشده بیر نېچه نظارت-اۉتکزیش پونکتلرینی تشکیل اېتگن.
نمایش ویدېولری عامهگه ترقهلگنیدن بیر ساعتدن آرتیق وقت اۉتگن بۉلسه-ده، نمایشچیلر نینگ تقدیری حقیده حاضرچه انیق معلومات یۉق.
سۉنگگی بیر نېچه کون دوامیده هرات یشاوچیلری طالبلرنینگ امر به معروف و نهی از منکر خادملری تامانیدن عیاللر و قیزلرنینگ کيینیش اسلوبی سببلی حبسگه آلینهیاتگنیگه قرشی جمعه کونی نمایش اۉتکزیشنی رېجهلشتیرهیاتگنی حقیده کۉپلب مراجعتلر و اعلانلر ترقهلگن اېدی.
شو سببلی طالبلر شهرنینگ تورلی حدودلریده، اینیقسه مرکزده، کېنگ کۉلمده حربي کوچ و تخنیکلرنی جایلشتیرگن اېدی.
بیراق اَیریم یشاوچیلر اوشبو چېکلاولرگه و طالبلرنینگ مناسبتیدن خبردار بۉلیشلریگه قرهمهی، بری بیر ناراضیلیک نمایشیگه چیقدی.
طالبلر سهشنبه کونی (۱۹-جوزا) هرات شهری نینگ غربیدهگی جبریل منطقهسی اهالیسینینگ ناراضیلیک نمایشینی هم شفقتسیزلرچه باستیرگن اېدی.
اطلاعات روز نشریگه یېتیب کېلگن ویدېولرده طالبلر کوچلری نمایشچیلرگه تۉغریدن-تۉغری اۉق اوزهیاتگنی، اَیریملرینی تیاق و تاشلر بیلن اورهیاتگنی کۉرینهدی. نتیجهده کمیده بیر نفر باله هلاک بۉلگن، ۲۰ گه یقین کیشی اېسه یرهلنگن.
