بلجیم تشقی ایشلر وزیرلیگی طالبلرنینگ مهاجرلرنی دېپورت قیلیش مسألهسی بۉییچه اروپا کمیسیونی بیلن مذاکره اۉتکزیش اوچون بروکسلگه رېجهلشتیریلگن سفری «اداری تۉسیق» بیلن یوزلشگنینی معلوم قیلدی.
بلجیم تشقی ایشلر وزیرلیگی مطبوعات سۉزلاوچیسی ماکسیم پرهوو پنجشنبه کونی (۲۱ جوزا) «اوراکتیو» نشریگه بېرگن صحبتیده طالبلر هیئاتی بروکسلگه سفر قیلیش اوچون حاضرگچه ویزه سۉراوینی تقدیم اېتمهگنینی ایتدی.
اونینگ سۉزلریگه کۉره: «بیز حلی اروپا کمیسیونینینگ تکلیفیگه بناءً طالبان هیئاتی اعضالریدن هېچ قندهی ویزه عریضهسینی آلگنیمیز یۉق.»
اونینگ ینه قۉشیمچه قیلیب، «بوندهی عریضهلر تېگیشلی شخصلرنینگ اۉزلری تامانیدن تاپشیریلیشی کېرهک»، دېدی.
اونینگ تأکیدلشیچه، ویزه عریضهلرینی کۉریب چیقیش و ویزه بېریش جریانی «احتمال بیر نېچه هفته» دوام اېتهدی.
خبرلرگه کۉره، بروکسلگه یوباریلهدیگن طالبان هیئاتیگه طالبان تشقی ایشلر وزیرلیگی مطبوعات کاتبی عبدالقهار بلخي رهبرلیک قیلهدی.
بیراق بلخي حاضرگچه نیمه سببدن ویزه عریضهلری یوباریلمهگنی حقیده ایضاح بېرمهگن.
دستلب اوراکتیو نشری اپریل آییده اروپا اتفاقی مهاجرلرنی دېپورت قیلیش مسألهسی یوزهسیدن مذاکره اۉتکزیش اوچون طالبان هیئاتینی بروکسلگه چقیرگنینی خبر قیلگن اېدی.
انسان حقوقلری تشکیلاتلری و افغانستان دیاسپورای وکیللری اروپا اتفاقی نینگ طالبان بیلن ملاقاتی اولرنینگ انسان حقوقلریگه ضد سیاستینی اعتباردن چېتده قالدیرهیاتگنینی همده افغانستاندهگی حاکمیتیگه سیاسي لېگیتیملیک بېرهیاتگنینی تأکیدلهماقده.
بیراق اروپا کمیسیونی طالبان و اروپا وکیللری اۉرتهسیدهگی مذاکرهلر مهاجرلرنی دېپورت قیلیش جریانینی یېنگیللشتیریش مقصدیده «تخنیکي درجهده» اۉتکزیلیشینی و مذاکرهلرده هېچ قندهی دیپلومات اشتراک اېتمسلیگینی بیلدیرگن.
