محلي منبعلر هراتنینگ جبریل منطقهسیدن اطلاعات روزگه معلوم قیلیشیچه، بوگون هم (پنجشنبه، ۲۱-جوزا) اوشبو منطقهده حربي محیط حکم سورماقده و طالبان کوچلری آدملرنینگ مبایل تیلفونلرینی تېکشیرماقده.
محلي منبعلردن بیرینینگ معلوم قیلیشیچه، طالباننینگ حربي کوچلری جبریلنینگ برچه قِسملریده جایلشتیریلگن بۉلیب، نظارت-اۉتکزیش پونکتلرینی تشکیل اېتگن.
منبعنینگ قۉشیمچه قیلیشیچه، «طالبان اۉرنتگن نظارت پونکتلریده آدملرنینگ شخصي تیلفونلرینی تېکشیرماقده.»
اونینگ سۉزلریگه کۉره، سۉنگّی ایکّی کون دوامیده هم کوزهتیلگن بو عملیاتنینگ مقصدی «نمایشچیلرنی انیقلش، ناراضیلیک جریانیدن تصویرلر آلینیشی و ترقهتیلیشی نینگ آلدینی آلیش»دیر.
شخصی سِر سقلنیشینی سۉرهگن منبعنینگ ینه قۉشیمچه قیلیشیچه، طالباننینگ موترسیکلده حرکتلنووچی گیزمهلری جبریل کۉچهلری بۉیلب ایلنیب یوریبدی.
سهشنبه کونی جبریلده بۉلیب اۉتگن خلق نمایشی باستیریلگنیدن سۉنگ، طالبان ناراضیلیکلرنینگ قَیته شکللنیشیگه یۉل قۉیمسلیک مقصدیده حدودگه اۉنلب قۉشیمچه کوچلر و گیزمهلر یوبارگن.
محلي منبعلرنینگ ایتیشیچه، نمایشچیلرنی تعقیب قیلیش طالبلر عملگه آشیرهیاتگن چارهلردن بیری دیر.
کېچه کمیده اوچ نفر منبع اطلاعات روز گزېتهسیگه طالبان استخبارات خادملری کوزهتوو کامرهلرینینگ هارد دیسکلرینی ییغیب کېتهیاتگنیگه گواه بۉلگنینی ایتگن.
اولرنینگ سۉزلریگه کۉره، طالبان بو آرقهلی «کوزهتوو کامرهلری تصویرلری نینگ ترقهلیشینی آلدینی آلیش» همده «نمایشچیلرنی انیقلش و کوزهتیش»نی مقصد قیلگن.
مذکور تصویرلرده طالبلر کوچلرینینگ یقین مصافهدن توریب نمایشچیلرگه تۉغریدن-تۉغری اۉق اوزهیاتگن حالتلری قید اېتیلگن بۉلیشی ممکن.
بیرلشگن ملتلر تشکیلاتی کمیده بیر کیشینینگ هلاک بۉلگنینی و ینه بیر نېچه نمایشچی یرهلنگنینی تصدیقلهگن.
