افغانستانده بیرلشگن ملتلر تشکلاتینینگ نمایندهلیگی (یوناما) هراتده تیناوون بۉلیب اۉتگن ناراضیلیک نمایشلری طالبان تامانیدن باستیریلگنی عاقبتیده بیر نفر اۉغیل باله اۉقدن هلاک بۉلگنی، ینه بیر نېچه کیشی تیاق بیلن کلتکلنیب یرهلنگنینی تصدیقلهدی.
یوناما بوگون (۲۰-جوزا) اعلان قیلگن بیاناتیده نمایشلر دوامیده ینه بیر کیشینینگ اۉلدیریلگنی حقیدهگی خبرلرنی هم اۉرگنهیاتگنینی معلوم قیلدی.
بیرلشگن ملتلر تشکیلاتی نمایندهلیگی معلوماتیگه کۉره، طالبان میلادی جاري آی نینگ آلتینچی و یېتّینچی کونلری هراتده کيینیش قاعدهلرینی بوزگنلیک عیبی بیلن کمیده 30 نفر عیالنی حبسگه آلگن، اۉنلب عیاللرگه آغزهکی آگاهلنتیریش بېرگن و اولرنی آینینگ سکّیزینچی کونیده آزاد قیلگن.
یوناما عیاللرنینگ حبسگه آلینیشی همده نمایشچیلرگه قرشی «حددن تشقری کوچ ایشلهتیلگنی»دن خواطر بیلدیریب، بوندهی حالتلر عیاللر و اولرنینگ عایلهلریگه چوقور تأثیر کۉرسهتیشینی تأکیدلهدی.
یوناما سرپرستی جورجت گانیون «افغانستانده عیالنینگ حبسگه آلینیشی کتّه اجتماعي تمغهنی کېلتیریب چیقرهدی. بو اېسه عیاللرنی آزاد اېتیلگنیدن کېین هم عایلهسی و جمعیتیده زۉروانلیک همده ینه-ده کوچلی یکّهلنیش خوفی آستیده قالدیریشی ممکن.»
گانیوننینگ تأکیدلشیچه، طالبان خلقارا حقوق نارمهلریگه موافق برچه افغانستان فقرالرینینگ سۉز اېرکینلیگی، تینچ ییغیلیشلر اۉتکزیش حقوقی، شخصي اېرکینلیک و خوفسیزلیک حقوقلرینی همده اۉزباشیمچهلیک بیلن حبسگه آلینمسلیک حقوقینی حرمت قیلیشی شرط.
یوناما برچه حقوقنی محافظه قیلیش چارهلری «ضرورت، متناسبلیک و کوچ ایشلهتیشده کمسیتمسلیک تمایللری کبی خلقارا حقوقي ستندردلرگه ماس بۉلیشی کېرهک»لیگینی تأکیدلهدی.
شونینگدېک، بیرلشگن ملتلر تشکیلاتی نمایندهلیگی «هر بیر انسان زۉروانلیک، قۉرقیتیش یاکه تعقیبدن قۉرقمسدن اۉز ناراضیلیگینی تینچ یۉل بیلن بیلدیریش حقوقیگه اېگه،» اېکنینی قید اېتدی.
یوناما طالباندن عیاللر و قیزلرنینگ انسان حقوقلری همده اساسي اېرکینلیکلرینی چېکلاوچی برچه سیاست و عملیاتلرنی، جملهدن حرکتلنیش اېرکینلیگی، سۉز اېرکینلیگی، تعلیم آلیش، ایشلش و جماعت حیاتیده اشتراک اېتیش بۉییچه چېکلاولرنی بېکار قیلیشنی طلب قیلدی.
هراتده اۉنلب عیاللر حبسگه آلینگنیدن سۉنگ، کېچه جبریل منطقهسی اهالیسی ناراضیلیک نمایشی اۉتکزیب، «تعلیم، ایش، اېرکینلیک» شعارلرینی ینگرهگن اېدی.
بیراق طالبان بیر نېچه دقیقه ایچیده اۉقاتر قورال و تیاقلردن فایدهلنیب نمایشنی ترقهتیب یوباردی. گروه کوچلرینینگ اۉق اوزیشی عاقبتیده کمیده تۉرت کیشی، جملهدن بیر باله یرهلندی.
تصدیقلنمهگن خبرلرگه کۉره، طالباننینگ نمایشچیلرگه قرهته اۉق اوزیشی عاقبتیده بیر عیال و بیر باله هم هلاک بۉلگن بۉلیشی ممکن، بیراق بو معلوماتلر حاضرچه مستقل روشده تصدیقلنمهگن.
