گزارشگر: ایماژ پارسیساز
ساعت تخمیناً 8:20 ده، اوییمدن چیقیشیم بیلن اۉق آوازلری ینگرهدی؛ کېتمه-کېت و اوزلوکسیز اۉق اوزیشلر هرات نینگ جبریل موضیعسیدهگی «چهاردهه متری بالا» تاماندن اېشیتیلردی. قدملریمنی تېزلهتدیم. «بهاری زندگی» چارراههسیگه قنچهلیک یقینلشسهم، اۉق آوازلری نینگ قولاقنی قامتگه کېلتیرووچی صداسی شونچهلیک بلندراق اېشیتیلیب، اطراف-هوانی توتیب بارردی.
فلکه اطرافیدهگی ایشچیلر همهسی تۉختهب قالگن، اولردن یوز مترچه نریده جایلشگن «بهاری زندگی» چاراههسیگه تیکیلیب توریشردی. اولر نینگ یوزلریده واهمه و خواطر عکس اېتیب، گۉیا هر لحظهده قاچیشگه شَی تورگندېک کۉرینردی. مېن فلکهدن اۉتیب، چاراهه تامان یۉل آلدیم. چاراههده تخمیناً 20 نفر طالبان تۉپلنگن اېدی. اولر نینگ قۉلیده قورال و تیاقلر بار اېدی. بیردن ایکّی نفر طالبان چاراهه یقینیده تورگن بیر کیشیگه تشلندی. اونی تیاق و میلتیق قۉنداغی بیلن اوره باشلشدی. ینه بیر طالبان اېسه فلکه تاماندن یقینلشیب کېلهیاتگن پیادهلر تامان یوگوریب باریب، اۉق اوزدی. او یۉلگه و پیادهلر نینگ آیاقلری آلدیگه بیر نېچه مرته اۉق اوزدی. اۉقلردن سچرهگن پرچه پیادهلردن بیری نینگ یوزیگه تېگیب، اونینگ باشی و یوزیدن قان آقه باشلهدی. بو حالت پیادهلر و فلکه ایشچیلری نینگ ینهده غضبلنیشیگه سبب بۉلدی و اولر «طالبانگه اۉلیم!» دېگن شعارلرنی هَیقیره باشلشدی.
کېتمه-کېت و تۉغریدن-تۉغری اۉق اوزیشلر، قۉل تیاقلری و میلتیق قۉنداقلری بیلن کلتکلش، حبسگه آلیش همده تاش آتیشلر طالبان نینگ هرات نینگ جبریل موضیعسیده خلق تامانیدن اۉتکزیلگن تینچ ناراضیلیک نمایشیگه بېرگن جوابی اېدی. بو طالبان گروهی نینگ تاباره کوچهییب بارهیاتگن و تینیمسیز زۉرآورلیگیگه قرشی کۉچهگه چیققن، اۉز آوازینی اېشیتتیرماقچی بۉلگن آدملرگه نسبتاً قۉللنگن زۉرآور مناسبت اېدی.
اطلاعات روزگه یوباریلگن ویدېولردن بیریده قوراللنگن طالبان کوچلری ناراضی یاشلرنی تیاق، میلتیق قۉنداغی و تاشلر بیلن کلتکلهیاتگنی کۉرینهدی. ویدېوده طالبان نینگ بیر اعضاسی یاش نمایشچیلردن بیرینی زۉرآورلیک بیلن اوریب-سورگن حالده حبسگه آلهدی. گروه نینگ ینه ایکّی اعضاسی نمایشچیلر تامانگه قرهته اۉق اوزهدی، قۉلیده تیاق توتگن باشقه کوچلر اېسه تیاق و تاشلر بیلن اولرگه هجوم قیلهدی. اوشبو حادثهده یرهلنگنلر نینگ انیق سانی حاضرچه معلوم اېمس. بیراق منبعلر اطلاعات روزگه کمیده تۉرت کیشی، جملهدن بیر باله نینگ هم جراحت آلگنینی تصدیقلهگن.
طالبانگه قرشی ناراضیلیک
هرات نینگ جبریل منطقهسیده اهالی نینگ، اینیقسه اېرککلر نینگ تینچ ناراضیلیک نمایشی طالبان سۉنگگی اوچ کون ایچیده ینگی حبسگه آلیشلر تۉلقینی دوامیده هرات شهری و جبریل حدودیدن کمیده 50 نفر عیال و قیزنی قۉلگه آلگنیدن کېین باشلندی. بو حرکت فقرالر، اینیقسه هرات اهالیسی آرهسیده کتّه غضب اویغاتدی.
اوشبو کېنگ کۉلملی حبسگه آلیشلر اۉتگن هفته جمعه کونی طالبان مسجدلر منبرلری و محله وکیللری آرقهلی اعلان قیلگن بویروقدن سۉنگ باشلندی. اونگه کۉره، اگر قیزلر و عیاللر اویدن تشقریده برقع یاکه چادرنمازسیز کۉرینسه، اولر حبسگه آلینیب، تۉغریدن-تۉغری قماققه یوباریلیشی ایتیلگن اېدی.
مذکور بویروق آرتیدن طالبان نینگ «امر به معروف و نهي از منکر» کوچلری شنبه کونی (16-جوزا) هرات شهری بۉیلب کمیده 40 نفر عیالنی حبسگه آلدی. یکشنبه کونی (17-جوزا) اېسه اولر جبریل حدودیگه باستیریب کیریب، بیر قنچه عیال و قیزلرنی قۉلگه آلیب کېتیشدی. حالبوکه، هراتدهگی عیاللر و قیزلر، اینیقسه جبریل حدودیده، اوّلگی حکومت دوریده هم، طالبان حکمرانلیگی دوریده هم چادرنماز کيیب یوریشگن. اطلاعات روز گه یوباریلگن ویدېولردن بیریده هم طالبان کوچلری چادرنماز کيگن بیر عیالنی حبسگه آلیب، موترگه چیقرهیاتگنینی کۉریش ممکن.
تعقیب و نظارت
جبریل منطقهسی اهالیسی نینگ تینچ نمایشینی باشلنیشیدن بیر نېچه دقیقه اۉتیب شفقتسیز طرزده باستیرگن طالبان نینگ قوراللی کوچلری کېینگی ساعتلرده نمایشچیلرنی تعقیب قیلیش و کوزهتیشگه کیریشدی. اوشبو کوچلر نینگ بیر قِسمی موتر سیکل، رنجر و شخصي موترلردن عبارت گروهلر شکلیده جبریل حدودی نینگ کۉچهلری و تار یۉلکلریده گزمهلیک قیلدی. باشقه بیر قِسمی اېسه ناراضیلیک نمایشی اۉتکزیلگن جای اطرافیدهگی بنالرنی کوزهتیب، صورت یاکه ویدېو آلهیاتگن هر قندهی کیشینی انیقلب، حبسگه آلدی.
بیر منبع اطلاعات روزگه شوندهی دېگن: «طالبان اویی نینگ دېرَزهسیدن ویدېو آلهیاتگن بیر کیشینی پَیقهب قالدی. اولر اۉشه آدمنی اوییدن سودرهب چیقریب، حبسگه آلدیلر.»
شونینگدېک، باشقه منبعلر هم اطلاعات روز بیلن صحبتده طالبان کوچلری نینگ اۉق اوزیشی و آدملرنی کلتکلش جریانیدن فوتو و ویدېولر آلگنلیکلرینی ایتیشدی. بیراق اولر طالبان تامانیدن تعقیب قیلینیشیدن قۉرقیب، بو ماتریاللرنی اجتماعي ترماقلر یاکه عامهوي اخبارات واسطهلری بیلن اولشیشگه جرعت قیلمهیاتگنلیکلرینی بیلدیریشدی. منبعلرگه کۉره، طالبان اَیریم حاللرده بازارلر و دوکانلردهگی کوزهتوو کامرهلریدن فایدهلنیب، فوتو و ویدېولر منبعسینی انیقلهگن همده بیر قطار کیشیلرنی حبسگه آلگن.
