منبعلرگه کۉره، بامیاننینگ پنجاب اولسواللیگیده بېش نفر اهالی کۉچمنچی (کۉچی) قوراللی گروهینینگ هجومیده جراحت آلگن. اوشبو هجوم آرتیدن طالبان پنجاب اولسواللیگیدهگی مخابراتی ترماقلر آنتنلرینی اۉچیریب قۉیگن.
منبعلرنینگ ایتیشیچه، شنبه کونی (۱۶جوزا) قوراللنگن کۉچمنچیلر مینگلب باش چاروا ماللری بیلن «زرسنگ» منطقهسیگه باستیریب کیرگن. محلي اهالی اېکین میدانلرینی ویران قیلینیشی نینگ آلدینی آلیش اوچون اولرنینگ کیریشیگه تۉسقینلیک قیلگن، بیراق قوراللنگن کۉچمنچیلر اۉق آتیش و تاش آتیش آرقهلی محلي اهالیگه هجوم قیلگن.
«اطلاعات روز» گزېتهسیگه یوباریلگن خبرگه کۉره، کۉچمنچیلر اۉز چاروالری بیلن آدملرنینگ اېکین میدانلری آرهسیدن بېملال اۉتیب کېتگن.
منبعگه کۉره، شنبه کونی زرسنگ اهالیسی کۉچمنچیلرنینگ چارواسینی آرقهگه قَیترگن. اولر «تالهقول» منطقهسیده بۉلگن پیتده اېسه قوراللنگن کۉچمنچی اېرککلر یېتیب کېلیب، محلي اهالیگه هجوم قیلگن.
منبعلر بو تۉقنهشووده بېش نفر محلي اهالی آغیر جراحت آلگنینی بیلدیرهدی. جراحتلنگنلر صفتیده نعیم، مهدی، حبیب، ابراهیم و حاجی اسحاق ناملری تیلگه آلینگن. اولر اۉق و تاش تېگیشی عاقبتیده باش و آیاق قِسمیدن جراحت آلگن.
شونینگدېک، «حاجی حبیب» و «حاجی اسحاق» اسملی ایکّی کېکسه اېرکک آغیر کلتکلنگن. اولردن بیری آیاغیدن اۉق یېگن و دوالنیش اوچون بامیان نینگ مرکزیگه آلیب کېتیلگن.
منبعلرگه کۉره، اوشبو حادثهدن سۉنگ پنجاب تومنیدهگی مخابراتی شبکهلر آنتنلری طالبان حاکمی بویروغی بیلن اۉچیریلگن و علاقه اوزیلیشی دوشنبه آقشامیگچه دوام اېتگن.
اهالی کۉچمنچی قوراللی گروهلرنینگ اېکین و ییلاو یېرلریده چاروالرینی «اېرکین و مطلق سکوت ایچیده» باقهیاتگنینی اَیتماقده.
منبعلرگه کۉره، طالبان مرکزدن پنجابگه هیئت یوبارگن، بیراق او کۉچمنچیلر بیلن اوچرهشوودن سۉنگ آرتگه قَیتگن.
هر ییلی بهار کېلیشی بیلن کۉچمنچیلر چاروالری بیلن افغانستان نینگ مرکزي منطقهلریگه کیریب بارهدی. طالبان حاکمیتگه کېلگنیدن سۉنگ بو حرکت هزارهلر یشهیدیگن حدودلر اوچون جدّي معماگه ایلنگن.
اېکین و ییلاولر نینگ ویران بۉلیشیدن تشقری، محلي اهالی کۉچمنچیلرنینگ زۉروانلیگی و تضییقلریگه هم دوچ کېلماقده. سۉنگگی ییللرده بیر نېچته محلي اهالی اوشبو تۉقنهشوولر عاقبتیده هلاک بۉلگن.
