بیرلشگن ملتلر تشکیلاتینینگ افغانستان بۉییچه مخصوص گزارشگری ریچارد بنت، هراتده اۉنلب عیاللرنینگ طالبان طلب قیلگن کيینیش قاعدهلریگه رعایه قیلمهگنی سببلی اوچینچی کون کېتمه-کېت حبسگه آلینهیاتگنیدن چوقور خواطر بیلدیردی.
بنت بوگون (۱۸-جوزا) ایکس اجتماعي ترماغیدهگی پُستیده شوندهی یازدی: «بو ناقانوني و قبول قیلیب بۉلمهیدیگن حالت دیر. حبسگه آلیشلر تۉختهتیلیشی و عیاللر زودلیک بیلن آزاد قیلینیشی کېرهک.»
سۉنگّی کونلرده طالبلرنینگ «امر به معروف و نهي از منکر» ادارهسی خادملری هرات ولایتینینگ تورلی حدودلریدن بیر قطار عیاللرنی گروه تامانیدن بېلگیلنگن حجاب قاعدهلریگه عمل قیلمهگنلیکده عیبلب حبسگه آلیب، قماققه جۉنتگن.
بو حبسلر طالبلرنینگ هراتدهگی «امر به معروف و نهي از منکر» ادارهسی عیاللرنینگ حرکتلنیشیگه ینگی چېکلاولر جاري اېتیب، «شرعي حجاب»گه رعایه قیلمهیدیگن، یوزی یاکه ساچی کۉرینیب تورگن عیاللرنی حبسگه آلیب، تۉغریدن-تۉغری قماققه یوباریش حقیده کۉرستمه بېرگنیدن کېین صادر بۉلگن.
افغانستانده بیرلشگن ملتلر تشکیلاتینینگ یاردم ادارهسی (یوناما) هم اوشبو حبسلر یوزهسیدن خواطر بیلدیریب، عملدهگی حاکمیتگه برچه انسانلر اېرکین حرکتلنیش حقوقیگه اېگه اېکنینی و عیاللر همده اېرککلر قانون آلدیده تېنگ حقلرگه اېگه بۉلیشی کېرهکلیگینی اېسلتگن.
طالبلر آلدین هم کابل و مملکتنینگ باشقه بیر قطار شهرلریده عیاللر همده یاش قیزلرنی اۉزلری بېلگیلهگن کيینیش قاعدهلریگه رعایه قیلمهگنلیک عیبلاوی بیلن حبسگه آلیب، قماققه تشلهگن اېدی.
