طالبلر رهبری هبتالله آخوندزاده یقینده «جهادي اثرلرنی سقلش تۉغریسیدهگی قانون»نی تصدیقلهدی. اوشبو قانونگه کۉره، طالبان نینگ اخبارات و مدنیت وزیرلیگی خودکوش هجومچیلر حقیدهگی روایتلرنی آوازلی و یازمه شکلده قید اېتیشی همده جنگچیلر و بۉچکه بۉمبهلری بیلن باغلیق اشیالرنی موزیملرده نمایش قیلیشی لازم.
ایکّی باب و اۉن تۉرت مادّهدن عبارت اوشبو حجت بوگون (دوشنبه، ۱۸-جوزا) طالباننینگ عدلیه وزیرلیگی تامانیدن عامهگه اعلان قیلیندی.
مذکور حجت اساسیده طالبان نینگ تورلی ملکی و حربي ادارهلری ناتو کوچلری همده جمهوریت تیزیمیگه قرشی آلیب باریلگن اوروش حقیدهگی واقعهلرنی یازمه و اودیو شکلده تۉپلش، ترقهتیش و نشر اېتیشگه مجبور اېتیلگن.
حجت نینگ اوچینچی مادّهسیگه کۉره، اخبارات و مدنیت وزیرلیگی ترکیبیده «جهادي اثرلرنی سقلش باشقرمهسی» ناملی مخصوص اداره تشکیل اېتیلگن.
یېتّینچی مادّهده اوشبو باشقرمه ۲۰۲۱-۲۰۰۱ ییللر آرهلیغیده امریکاگه قرشی آلیب باریلگن ییگیرمه ییللیک اوروش نینگ مادّي و معنوي میراثینی همده «اسلامي طالبان حرکتی» نینگ شکللنیش تاریخینی قید اېتیش اوچون مسوول اېکنی ایتیلگن.
شو مادّه دایرهسیده «دشمننینگ جنایتلری و ظلملری» هم حجتلشتیریلیشی کېرهکلیگی تاکیدلنگن.
بیراق قانوننینگ اۉن ایکّینچی مادّهسیده جهادي اثرلرنی سقلش باشقرمهسی «هېچ قندهی حالتده جانلی موجوداتلرنینگ تصویرلرینی قید اېتیشی، سقلشی یاکه ترقهتیشی ممکن اېمسلیگی»، برچه معلوماتلر فقط متن و آواز شکلیده بۉلیشی کېرهکلیگی بېلگیلنگن.
حجت نینگ سکّیزینچی مادّهسی ایکّینچی بندیده طالبان تامانیدن افغانستانده عملگه آشیریلگن خودکوشلیک هجوملری و اولر بیلن باغلیق خبرلرنی قید اېتیش همده حجتلشتیریش لازملیگی قید اېتیلگن.
خودّی شو مادّه نینگ بیرینچی بندی اۉن ایکّینچی قِسمیده جهادي اثرلرنی سقلش باشقرمهسی جمهوریت تیزیمیدهگی «اخلاقي، مدني، اعتقادي و سیاسي ناساغلاملیکلر» همده «قومي، منطقوی و تیلگه عاید تعصبلر»نی هم تۉپلشی شرطلیگی ایتیلگن.
تۉقّیزینچی مادّه نینگ بیرینچی بندیگه کۉره، تانکلر، تیک اوچرلر، تۉپلر، حربي ترانسپورت واسطهلری و باسقینچیلردن قالگن باشقه جهازلر نمونوی طرزده موزیملرده نمایش اېتیلیشی کېرهک.
اوشبو مادّه نینگ ایکّینچی بندیده: «دشمن نینگ اصلی بو یېرده موجود بۉلمهگن اوچاقلری و حربي واسطهلری نینگ نسخهلری تیارلنیب، نمایشگه قۉییلسین»، دېب یازیلگن.
اوچینچی بندده اېسه «جهادده فایدهلنیلگن واسطهلر نینگ (یېنگیل و آغیر قوراللر، ماینلر و قۉلده تیارلنگن بۉچکه بۉمبهلری، راکتلر، توزاقلر، مصافهدن باشقروو قوریلمهلری و باشقه جهادي اشیالر) نمونهلری باتفصیل یازمه روشده قید اېتیلیشی» بېلگیلنگن.
مادّي اشیالر بیلن بیر قطارده طالبان نینگ معنوي میراثی هم قید اېتیلیشی کېرهک.
حجتده معنوي میراث «شهید بۉلگن مجاهدلرنینگ حکایهلری، خاطرهلری، شعرلری، قۉشیقلری، آغزهکی روایتلری و قهرمانلیک داستانلری کۉرینیشیده خلق نینگ خاطرهسی و قلبیده سقلنیب قالگن میراث» دېب تعریفلنگن.
بیراق هلاک بۉلگن طالبان جنگچیلری نینگ صورتلریدن فایدهلنمسلیک علیحده تاکیدلنگن.
سۉنگگی قریب بېش ییل دوامیده طالبان کابل، قندههار، کاپیسا و باشقه بیر قطار ولایتلردهگی موزیملر همده اخبارات و مدنیت باشقرمهلریده اۉزی نینگ «جهادي اثرلر کۉرگزمهلری»نی تشکیل اېتیب کېلماقده.
بو کۉرگزمهلرنینگ اکثریتیده «خودکشلیک جلیقهلر» و یۉللر چېتیگه، کۉپریکلر آستیگه اۉرنهتیش اوچون ایشلهتیلگن مشهور سریق بۉچکه بۉمبهلری، شونینگدېک، شهرلرده و یۉللرده ترانسپورت واسطهلرینی پارتلهتیش یاکه مقصدلی سوءِقصدلر اوچون قۉللنیلگن ماینلر نمایش اېتیلگن.
بعضی حاللرده اېسه فعال حالتدهگی یاکه پارتلهمهگن قورال-اسلحهلر هم اوشبو کۉرگزمهلرده نمایشگه قۉییلگن.
