اسرایل باش وزیری دفترینینگ معلوم قیلیشیچه، اوشبو مملکت لبنان پایتختی بیروتدهگی ضاحیه منطقهسیده «ترورچیلر مرکزی» دېب تعریفلنگن حدودگه هجوم قیلگن.
بیاناتگه کۉره، هجوم بوگون (یکشنبه، ۱۷-جوزا) اسرایل باش وزیری بنیامین نتانیاهو و اسرایل مدافعه وزیری اسرایل کاتس نینگ بویروغی بیلن عملگه آشیریلگن.
اسرایل تامانی بو هجوم حزبالله تامانیدن اسرایل حدودیگه قیلینگن هجوملرگه جواب اېکنینی بیلدیرگن.
«الجزیره» خبریگه کۉره، درون یاکه راکت آرقهلی عملگه آشیریلگن ضربه بیر بنا نینگ بیر نېچه قبتیگه تېگیب، قربانلر هم کېلتیریب چیقرگن، بیراق انیق تلفاتلر سانی حاضرچه معلوم اېمس.
بو هجوم امریکا جمهور رییسی دونالد ترامپ آلتی کون اوّل اسرایل بیروتگه هجوم قیلمسلیگی و حزب الله هم اۉز هجوملرینی تۉختهتیشی حقیده بیانات بېرگنیدن کېین صادر بۉلگن.
شونگه قرهمهی، سۉنگّی کونلرده اسرایل لبنان جَنوبیدهگی حدودلرگه بیر نېچه بار ضربه بېرگن، حزبالله هم اۉز هجوملرینی دوام اېتتیرگن.
اسرایل نینگ بیروتگه هجوم قیلیش قراریدن سۉنگ، ایران تامانلری بیر جبههدهگی صلح بوزیلیشی برچه جبههلرده صلح بوزیلیشی حسابلنیشینی و بونینگ عاقبتلری اوچون امریکا همده اسرایل جوابگر بۉلیشینی بیلدیرگن.
سۉنگّی ضربهلر اسرایل و لبنان حکومتی اۉرتهسیده امریکا واسطهچیلیگیده امضالنگن ینگی اۉت آچیشنی تۉختهتیش کېلیشوویدن بیر نېچه کون اۉتیب عملگه آشیریلگن.
