افغانستاندهگی بیرلشگن ملتلر تشکیلاتی یاردم ادارهسی (یوناما) طالبان تامانیدن هراتده عیاللرنینگ «کيینیش طلبلریگه رعایه قیلمهگنی» سببلی عامهوي روشده حبسگه آلینهیاتگنی و اوشلب توریلهیاتگنیدن خواطر بیلدیرگن.
یوناما بوگون (یکشنبه، ۱۷-جوزا) نشر قیلگن بیاناتیده اوشبو حبسلر «انسان حقوقلری بیلن باغلیق جدّي خواطرلرنی کېلتیریب چیقرهیاتگنینی» تأکیدلهدی.
بیاناتده شوندهی دېییلهدی: «بیز عملدهگی حاکمیتگه (طالبانگه) برچه انسانلر اېرکین حرکتلنیش حقوقیگه اېگه اېکنینی اېسلهتهمیز. شونینگدېک، عیال و اېرککلردن قطعی نظر، برچه شخصلر قانون آلدیده تېنگ حقوقلرگه اېگه بۉلیشی کېرهک.»
سۉنگگی ایکّی کون ایچیده طالبان نینگ امر به معروف و نهي از منکر خادملری هرات ولایتیده گروه طلب قیلگن کيینیش قاعدهلریگه عمل قیلمهگنلیکده عیبلب، بیر قطار عیاللرنی حبسگه آلگن.
بوگون هرات نینگ جبرئیل منطقهسیدن ترقهلگن ویدیوده طالبان خادملری بیر عیالنی قۉلگه آلیب، موترگه چیقریب کېتهیاتگنی عکس اېتگن.
حاضرچه حبسگه آلینگن عیاللرنینگ انیق سانی و اولر نینگ کېینگی تقدیری حقیده معلومات یۉق.
طالبلر نینگ امر به معروف و نهي از منکر ادارهسی اۉتگن هفته پنجشنبه کونی بېرگن کۉرسهتمهده، شو هفته نینگ شنبه کونیدن باشلب یوزی یاکه ساچی کۉرینیب قالگن عیاللر و قیزلر حبسگه آلینیب، «تۉغریدن-تۉغری» قماقخانهگه یوباریلیشینی بویورگن اېدی.
طالبلر بوندن اوّل هم کابل و مملکت نینگ باشقه اَیریم شهرلریده عیاللر همده یاش قیزلرنی اۉزلری بېلگیلهگن کيینیش قاعدهلریگه رعایه قیلمهگنی اوچون حبسگه آلیب، قماققه تشلهگن.
