بدخشان ولایتی نسی اولسواللیگینینگ یوزلب اهالیسی بوگون (یکشنبه، ۱۷-جوزا) طالبان تامانیدن آلتین یوویش کارگاهلری فعالیتینینگ تعقیقلنیشیگه قرشی ناراضیلیک نمایشی اۉتکزدی.
نمایشچیلرنینگ ایتیشیچه، طالبان اولرگه «ایش رخصتنامهسی» و کانلرده ایشلش حقوقینی بېرمهیپتی. شو سببلی اولر اۉز حقوقلرینی حمایه قیلیش اوچون کۉچهگه چیققن.
اولر طالبلردن خلق حقوقلرینی شریعت، قانون و هبتالله آخوندازده کۉرسهتمهلریگه موافق تأمینلشنی همده یشاوچیلر حقوقلریگه نسبتاً سلقهوی یاندهشمسلیکنی طلب قیلماقده.
نمایشچیلر طالبان مسووللرینی آگاهلنتیریب، «خلق عامهسی نینگ قۉزغلانی یامان عاقبتلرگه آلیب کېلیشینی یاد-ده توتیشلری کېرهک»، دېب تأکیدلهگن.
اولر نینگ فکریچه، هر قندهی حکومت نینگ وظیفهسی اهالی اوچون تیریکچیلیک، تعلیم، ساغلیقنی سقلش و خوفسیزلیک امکانیتلرینی یرهتیشدن عبارت بۉلیشی کېرهک. شونینگدېک، اولر حکومت اوّلگی پادشاهلر کبی فقط خلقدن خدمت کوتووچی توزومگه ایلنمسلیگی لازملیگینی بیلدیرگن.
سۉنگّی پیتلرده طالبان بدخشانده آلتین یوویش کارگاهلری فعالیتینی تعقیقلهگن. نتیجهده اوشبو ساحهده ایشلهگن مینگلب ایشچیلر ایشسیز قالگن.
طالبلرنینگ بدخشاندهگی محلي مسووللری فقط رخصتنامهسیز فعالیت یوریتهیاتگن اوستاخانهلر یاپیلگنینی اَیتماقده. بیراق محلي اهالی وکیللری نینگ تأکیدلشیچه، طالبان ولایتدهگی کانلرنی قزیب آلیش نظارتینی محلي اهالی نینگ قۉلیدن آلیب، باشقه حدودلردن کېلگن شخصلرگه تاپشیرگن.
