جهان آزیق-آوقت دستوری ینگی حساباتیده آگاهلنتیریشیچه، اگر افغانستان و پاکستان اۉرتهسیدهگی چېگره یاپیق قالیشده دوام اېتسه همده یقین شرقدهگی بحران ینه-ده کوچهیسه، افغانستانده قۉشیمچه ۲.۳ میلیون کیشی آزیق-آوقت خوفسیزلیگیدن محروم بۉلهدی. بو اېسه الّهقچان آزیق-طعام تنقیصلیگی بیلن کورهشهیاتگن ۱۳.۸ میلیون کیشیگه قۉشیمچه روشده یوز بېرهدی.
دستور جمعه کونی، ۱۵-جوزاده اعلان قیلگن گزارشیده یقین شرقدهگی اوروش عاقبتلری حقیده اوّل بېریلگن آگاهلنتیریشلر اېندیلیکده حقیقتگه ایلنهیاتگنینی معلوم قیلگن.
حساباتیده تأکیدلنیشیچه، تشکیلات نینگ ینگی تحلیلی اوشبو ماجرا نینگ اېنگ ضعیف مملکتلرگه تأثیری چوقور و اوزاق مدتلی بۉلیشینی کۉرستماقده.
مارچ آییده اگر یقین شرقدهگی اوروش دوام اېتسه و جون آخریگچه نفت نرخی بیر بررېل اوچون تخمینا۱۰۰ دالر اطرافیده قالسه، ۴۵میلیون کیشی اۉتکیر آزیق-آوقت تنقیصلیگیگه دوچ کېلیشی ممکنلیگینی معلوم قیلگن اېدی.
تشکیلاتگه کۉره، بو سناریو حاضر عملده رۉی بېرماقده.
«باسیم آستیدهگی آزیق-آوقت خوفسیزلیگی: یقین شرق بحرانی ضعیف مملکتلرگه قندهی تأثیر قیلماقده» ناملی ینگی گزارشده اوچته ضعیف مملکتدهگی وضعیت تحلیل قیلینگن.
حساباتگه کۉره، سومالی قۉشیمچه ۲.۵ میلیون، سریلانکاده۱.۳ میلیون و افغانستانده ۲.۳ میلیون کیشی اساسي آزیق-طعام احتیاجلرینی قاندیریشده قیینچیلیککه دوچ کېلماقده همده اَیریم حاللرده اۉتکیر آچلیک خوفی آستیده قالماقده.
جهان آزیق-طعام خوفسیزلیگی و طعاملنیش تحلیلی خدمتلری مدیری ژان مارتین باوئر شوندهی دېگن: «اېرته آگاهلنتیریشلر فقط دنیا اولرگه عمل قیلگن تقدیردهگینه اهمیت کسب اېتهدی. بیز بو بحران میلیونلب آدملرنی آچلیککه آلیب کېلیشی ممکنلیگی حقیده آگاهلنتیرگن اېدیک. اېندی اېسه بو نینگ عملده صادر بۉلهیاتگنیگه گواه بۉلماقدهمیز. کۉپلب حاللرده بحران مرکزیدن اوزاقده یشهیاتگن اېنگ کمبغل عایلهلر اېنگ کتّه ضرر کۉرماقده.»
معلوماتیگه کۉره، ماجرا، اقلیم ضربهلری و اقتصادي معمالر بیلن یوزلشهیاتگن یاکه ایمپورتگه کوچلی درجهده قرم بۉلگن مملکتلر یقین شرقدهگی بحراندن اېنگ کۉپ ضرر کۉرماقده. چونکه یاقیلغی، اۉغیت و آزیق-طعام نرخلری آشیشده دوام اېتماقده.
تشکیلات بو تأثیرلر یقین شرقدهگی وضعیت یومشهگن تقدیرده هم یقین آیلرده کوچهییشی کوتیلهیاتگنینی بیلدیرگن.
حساباتده قید اېتیلیشیچه، دنیا نینگ اَیریم حدودلریده دهقانلر اۉغیت تنقیصلیگی و یوقاری یاقیلغی نرخلری شرایطیده اېکین موسمینی اۉتکزماقده. بو اېسه کېلگوسی آیلرده حاصلدارلیککه و آزیق-آوقت نرخلریگه سلبي تأثیر کۉرسهتیشی ممکن.
ژان مارتین باوئرنینگ تأکیدلشیچه، اېنگ کتّه خواطرلردن بیری شوندهکی، بحران نینگ تۉلیق عاقبتلری حلی سېزیلگنی یۉق. حتا ماجرا بوگون توگهگن تقدیرده هم، یېتکزیلگن ضررلر اوزاق وقت دوامیده نرخلر، اهالی تورموشی و انسانی عملیاتلرگه تأثیر کۉرسهتیشده دوام اېتهدی.
تدقیقاتده افغانستان، سومالی و سریلانکا اۉرگنیلگن.
افغانستانده آچلیک و تۉییب طعاملنمسلیک درجهسی الّهقچان یوقاری بۉلیب تورگن بیر پیتده، جهان آزیق –آوقت دستوری تحلیلیگه کۉره، پاکستان بیلن چېگره اوزاق مدت یاپیق قالسه و یقین شرقدهگی بحران ینه-ده کوچهیسه، قۉشیمچه ۲.۳ میلیون کیشی آزیق-طعام خوفسیزلیگیدن محروم بۉلیشی ممکن.
بو اېسه بحران باشلنیشیدن آلدین هم آزیق-طعام تنقیصلیگیگه دوچ کېلگن ۱۳.۸ میلیون کیشیگه قۉشیمچه یوک بۉلهدی.
افغانستان اېکسپورتی نینگ ۶۰ فایزی و امپورتی نینگ ۵۰ فایزی ایران بیلن باغلیق اېکنی هم وضعیتنی ینه-ده مرکّبلشتیرماقده.
حساباتده یقین شرقدهگی اوروش گلوبل انسانی تیزیمگه تاباره کوچهییب بارهیاتگن باسیم اۉتکزهیاتگنی تأکیدلنگن.
جهان آزیق –آوقت دستوری حاضرده احتیاجلرنینگ آرتیشی، یېتکزیب بېریش خرجتلری نینگ کۉپهییشی و مالیهلشتیریش نینگ کمهییشی بیلن یوزلشهیاتگنینی بیلدیرگن.
تشکیلات نینگ قۉشیمچه قیلیشیچه، اگر ماجرا کېلگوسی آیلر دوامیده هم دوام اېتسه، ۹میلیوندن آرتیق آدم انسانی یاردمدن محروم بۉلیشی ممکن.
