اسپانیاده استقامت قیلهیاتگن بیر گروه افغانستانلیک عیاللری طالباننینگ اروپاگه چقیریلیشیگه قرشی ناراضیلیک بیلدیریب، مادرید شهریدهگی اروپا پارلمانی وکالتخانهسی آلدیده نمایش اۉتکزدی.
نمایشچیلر طالبانگه قرشی شعارلر کۉتریب، بو گروه تینچلیک شېریگی اېمس، بلکه جنسیتی آپارتایدنینگ عملگه آشیرووچیسی اېکنینی تأکیدلهدیلر.
معلوماتلرگه کۉره، اروپا کمیسیونی افغانستانگه مهاجرلرنی دېپورت قیلیش مسألهسی بۉییچه مذاکرهلر اۉتکزیش اوچون طالبان نینگ تخنیکي هیئاتینی بروکسل چقیریلیشی ممکن.
کمیسیون حاضرچه طالبان هیئاتی نینگ رسمي چقیریلگنینی تصدیقلهمهگن بۉلسه-ده، اروپاده یشش حقوقیگه اېگه بۉلمهگن مهاجرلرنی دېپورت قیلیش مسألهسیده اوشبو گروه بیلن تخنیکي ملاقات آلیب باریلهیاتگنینی تصدیقلهگن.
اسپانیادهگی افغانستانلیک نمایشچیلر قبول قیلگن قطعنامهده طالباننی اروپا پارلمانیگه تکلیف قیلیش، قبول قیلیش یاکه اولر بیلن هر قندهی رسمي علاقهلرنی قارهلهگنلر.
اولر شوندهی دېگن: «بیز اروپا پارلمانیدن طالباننی عادتي و قانوني سیاسي کوچ صفتیده کۉرسهتیشگه خدمت قیلهدیگن هر قندهی علاقهلرنی تۉختهتیشنی و افغانستان عیاللری تامانیده توریشنی سۉرهیمیز.»
نمایشچیلر خلقارا همجمعیتنی طالبانگه منبر بېریش اۉرنیگه، اولرنی جوابگرلیککه تارتیش چارهلرینی کۉریشگه چقیردیلر. شونینگدېک، اولر جنسیتی آپارتاید عادتيلشتیریش اېمس، بلکه اونگه برهم بېریش اوچون حرکت قیلیش ضرورلیگینی تأکیدلهدیلر.
