انسان حقوقلری تشکیلاتی ههنگاو اۉز گزارشیده افغانستان فقراسی حمیرا شریفی اۉتگن ییلنینگ جدی آییدهگی نمایشلرده قتنشگنی سببلی بېش ییلگه آزادلیکدن محروم اېتیلگنینی معلوم قیلدی.
تشکیلات بوگون (۱۴ جوزا) نشر قیلگن بیاناتیده سیاسي محبوس حاضرده اوین قماقخانهسیده سقلنهیاتگنینی و بېش ییللیک قماق جزاسی یقینده اونگه رسماً یېتکزیلگنینی بیلدیردی.
ههنگاو معلوماتیگه کۉره، حمیرا شریفی قماقدهگی آغیر شرایطلر سبب تېری کسللیگیگه چلینگن، شونینگدېک، اونینگ روحي حالتی هم جدّي یامانلشگن. تشکیلات قماقخانه مأموریتی اونی مخصوص طبي مرکزلرگه یوباریش و یېترلی طبي یاردم کۉرسهتیشدن باش تارتهیاتگنینی تأکیدلهگن.
منبعلرگه تهیهنیب، تشکیلات شریفی نینگ شخصینی تصدیقلاوچی حجتلری یۉقلیگینی همده اوین قماقخانهسیگه اۉتکزیلگنیدن بویان ایکّی مرته اۉز جانیگه قصد قیلیشگه اورینگنینی، سۉنگگی حالت اېسه اۉتگن هفته صادر بۉلگنینی قید اېتگن.
گزارشگه کۉره، او ۱۴۰۴-قویاش ییلی نینگ جدی آییدهگی ناراضیلیک نمایشلری وقتیده حبسگه آلینگن. دستلب قرچک تورمهسیگه یوباریلگن، کېینچهلیک ۲۷ دلو کونی اوین قماقخانهسینینگ عیاللر بۉلیمیگه کۉچیریلگن.
