ایران اسلام جمهوریتی جمهور رییسی مسعود پزشکیان، تنیقلی شیعه مرجعی تقلیدی محمد اسحاق فیاضنینگ وفاتی مناسبتی بیلن تعزیه یۉلهدی.
بوگون (۱۴ جوزا) اعلان قیلینگن مراجعتده پزشکيان شوندهی دېدی: «بو اولوغ دیني عالِم اۉزینینگ برکتلی عمرینی اهلی بَیت معرفتینی ترغیب قیلیش، شاگردلر تربیهلش، اسلامي علملرنینگ اېنگ یوقاری باسقیچلریده تعلیم و تدقیقات آلیب باریش همده مسلمان امتیگه صدقِ دلدن خدمت قیلیش یۉلیده اۉتکزدی. او دیني علم مرکزلری و شیعهلیک عالمی اوچون مهم علمي میراث قالدیردی.»
ایران جمهور رییسی اونینگ علمي صلاحیتی، معتدللیک یۉلی، اخلاصی، تقواسی، مسلمانلر بیرلیگیگه اعتباری و خلققه خدمت قیلیشدهگی سعی-حرکتلری اسلام عالمی اوچون قیمتلی میراث بۉلیب قالیشینی تأکیدلهدی.
آیتالله فیاضنینگ رسمي سایتی بوگون اېرتهلب اونینگ 96 یاشیده عراقده وفات اېتگنینی معلوم قیلدی.
محمد اسحاق فیاض 1309-قویاش ییلده غزنی ولایتینینگ جاغوری اولسواللیگیده توغیلگن. او نجفدهگی دیني علم مرکزلریده تحصیل آلیب، اجتهاد درجهسیگه اېریشگن اېدی.
او افغانستان نینگ هزاره کېلیب چیقیشلی کم سانلی دیني علمالریدن بیری بۉلیب، سۉنگگی ییللرده آیتالله علی سیستانی و آیتالله بشیر نجفیبیلن بیر قطارده نجفدهگی اېنگ نفوذلی شیعه مرجعلریدن بیری حسابلنردی.
فیاضنینگ وفاتی مناسبتی بیلن عراق حکومتی اوچ کونلیک عمومي ماتم اعلان قیلگن.
