فاریاب ولایتیدهگی محلي منبعلرنینگ ایتیشیچه، بو ولایتنینگ پشتونکوت اولسواللیگی نینگ «سرحوض» منطقهسیده مهربان ناملی ۱۹یاشر یاش ییگیت چۉمِیلیش پیتیده چۉکیب، جان بېرگن.
منبعلرنینگ ایتیشیچه، اوشبو واقعه بوندن تۉرت کون آلدین (یکشنبه،۹ جوزا) پشتونکوت اولسواللیگینینگ «سرحوض» منطقهسیدهگی سوو تۉغانیده یوز بېرگن.
محلي منبعلرنینگ بیلدیریشیچه، اوشبو یاشنینگ جسدی محلي اهالی همده ولایتدن باریگن سووگه چۉمیلوچیلرنینگ آلیب بارگن سعی و حرکت قرهمهی، جسد هنوز سوو آستیدن چیقاریلمهگن. مهرباننینگ عایلهسی مملکت بۉیلب سووگه چۉمیله آلهدیگن ماهر آدملردن جسدنی چیقاریب بېریش اوچون یاردم سۉرهگن.
محلی منبعلرنینگ قۉشیمچه قیلیشیچه، میمنه مرکزی خواجه پایتخت قیشلاغینینگ مذکور یشاووچیسی دَم آلیش اوچون «سرحوض» منطقهسیدهگی سوو توغانیگه بارگن، بیراق چۉمِیلیش وقتیده سووگه غرق بۉلیب، حیاتدن کۉز یومگن.
تیناوون شونینگدېک، لغمان ولایتی قرغهای اولسواللیگیده۱۴ یاشلی باله چۉمِیلیش پیتیده چۉکیب، جان بېرگن.
جاري ییلده مملکتنینگ تورلی ولایتلریدن بوندهی واقعهلرنینگ بیر نېچتهسی قید اېتیلگن.
دریالر و سوو تۉغانلری یقینیده احتیاطسیزلیک همده قوتقروو جهازلرینینگ یېتیشمسلیگی بوندهی حادثهلرنینگ اساسي سببلری صفتیده تیلگه آلینماقده.
