بیرلشگن ملتلر تشکیلاتینینگ آزیق-آوقت و اېکینچیلیک تشکیلاتی (فائو) جاري ییل جون آییده افغانستانده عمومي یاغینگرچیلیک مقداری معیار درجهسیگه یقین بۉلیشینی پیشبنلیک قیلگن.
مذکور تشکیلات بوگون (چهارشنبه،۱۳ جوزا) نشر قیلگن گزارشیده ایتیلیشیچه، بو آیده افغانستاننینگ شِمالی-شرق ولایتلریده یاغاینگرچیلیک مقداری اۉرتهچه کۉرستکیچدن یوقاری بۉلهدی، اما جَنوبي و غربي ولایتلر عادتدهگی مۉدلگه موافق، هنوز قوروق حالتده قالهدی.
فائو شونینگدېک، قیسقه مدتلی کوچلی یاغاینگرچیلیکلر، اینیقسه شِمالی-شرق، شرق و جَنوبی-شرق حدودلریده تۉستدن سېل تاشقینلری و دۉل یاغیشی خوفینی کېلتیریب چیقریشی ممکنلیگینی، بو اېسه قیشلاق خۉجهلیگی اېکینلری و سوو منبعلریگه ضرر یېتکزیشی ممکنلیگینی ایتگن.
بیرلشگن ملتلر تشکیلاتی نینگ آزیق-آوقت و قیشلاق خۉجهلیگی تشکیلاتی، شونینگدېک، افغانستانده یاز عادتدهگیدن ایسّیقراق باشلنیشینی و جون آییده بوتون مملکت بۉیلب حرارت اۉرتهچه درجهدن یوقاری بۉلیشینی، جَنوبي و غربي حدودلرده اېسه اېنگ کتّه حرارت آشیشی کوزهتیلیشینی بیلدیرگن.
اوشبو تشکیلات معلوماتیگه کۉره، جون آییدهگی کۉپ مۉدللی حرارت پراگنازلری جَنوبي و غربي افغانستانده حرارت اۉرتهچه کۉرسهتکیچدن تخمیناً 0.5 دن 2 درجه سېلسيگچه یوقاری بۉلیشینی کۉرسهتهدی. بو حدودلر نینگ کۉپ قِسمیده ماکسیمال حرارت 35 درجهدن آشیب کېتهدی، بو اېسه بوغلنیش تېزلیگینی آشیرهدی و اېکینلر نینگ سووگه بۉلگن احتیاجینی کۉپهیتیرهدی.
فائونینگ قۉشیمچه قیلیشیچه، قار قاپلهمی نینگ کمهییشی و ایسّیقراق شرایطلر موسم آخریده قار اېریشیدن حاصل بۉلهدیگن سوو آقیمینی چېکلشی ممکن.
اېکینچیلیک وضعیتی
فائو گزارشیده ایتیلیشیچه، دله کوزهتوولری قیشلاق خۉجهلیگی ساحهسینینگ نسبتاً یخشی حالتده اېکنینی و مملکت نینگ کۉپ حدودلریده حاصل بۉییچه ایجابي کوتیلمهلر موجودلیگینی کۉرستماقده.
تشکیلاتنینگ ایتیشیچه، ییلاولر هم سۉنگگی یامغیرلر طفیلی سېزیلرلی درجهده تیکلنگن، بیراق اَیریم شمالي حدودلر هنوز باسیم آستیده قالیب، دواملی یاغاینگرچیلیککه محتاج.
فائو افغانستان نینگ۳۴ ولایتیده تېزکار بهالش اۉتکزگنینی بیلدیرگن. اوشبو جریانده۳۴۵ ته گروه اوچرهشووی آرقهلی دهقانلر، محلي آقسقاللر، چاروادارلر، اۉقیتووچیلر، رواجلنیش کېنگشی اعضالری، محلي سوداگرلر، ساغلیق خادملری، وترنرلیک متخصصلری و قیشلاق خۉجهلیگی باشقرمهلری متخصصلری بیلن اېکینلر، للمی و سوغاریلهدیگن یېرلر، ییلاولر و سووگه کیریش امکانیتی اۉرگنیلگن.
گزارشگه کۉره، اشتراکچیلر نینگ۸۰ فایزی بوغدای نینگ اۉسیشی نارمل یاکه عادتدهگیدن اېرته باسقیچده اېکنینی ایتگن. حاصل ییغیمی پست و اۉرتهچه بلندلیکدهگی حدودلرده باشلنگن، ییلاولرده اېسه ییغیم-تېریم عرفهسیده توریبدی.
حساباتده۶۵ فایز اشتراکچی توپراق نملیگینی یېترلی دېب بهالهگن،۶۴ فایز اېسه اۉرتهچه یاکه یخشی حاصل کوتیلهیاتگنینی بیلدیرگن.
فائو معلوماتیگه کۉره، سوغاریلهدیگن بوغدای نینگ اۉسیشی۶۱ فایز حدودلرده نارمل،۲۸ فایز حدودلرده اېسه عادتدهگیدن اېرته قید اېتیلگن.
ییلاولر حالتی بۉییچه اېسه۶۴ فایز حدودلرده اۉسیملیک قاپلهمی رواجلنیشی کوزهتیلگن،۲۶ فایز حدودلرده فقط چېکلنگن اونیب چیقیش،۱۰ فایز حدودلرده اېسه عموماً باشلنمهگن یاکه بهالش امکانی بۉلمهگن حالتلر قید اېتیلگن.
سوو تنقیصلیگی خوفی
فائو گزارشیگه کۉره، مملکتده سووگه اېریشیش امکانیتی اۉتگن آیگه نسبتاً کمهیگن.
اوشبو تشکیلات معلوماتیگه کۉره، بو آیده دهقانلر نینگ۵۰فایزی سوغاریش اوچون سوو یېترلی اېکنینی بیلدیرگن، اۉتگن آیده اېسه بو کۉرستکیچ۷۷ فایز اېدی.
فائو شونینگدېک، حدودلرنینگ تخمیناً۴۰ فایزی سوغاریش اوچون یېر آستی سوولریگه تهیهنیشینی و یېر آستی سوولری سطحی نینگ پهسهییشی اېنگ مهم چېکلاولردن بیری صفتیده قید اېتیلگنینی ایتگن.
تشکیلاتنینگ قۉشیمچه قیلیشیچه، دریالر آقیمی نینگ کمهییشی، کانال سوولرینی باشقریشدهگی معمالر و سوو تقسیماتی بۉییچه کېلیشماوچیلیکلر هم سوغاریش سووی تنقیصلیگیگه تأثیر قیلووچی عامللر صفتیده کۉرسهتیلگن.
بیرلشگن ملتلر تشکیلاتی نینگ آزیق-آوقت و قیشلاق خۉجهلیگی تشکیلاتی نینگ ایتیشیچه، اوشبو معمالرگه قرهمهی حاضرچه اېکینلرگه جدّي و کېنگ کۉلملی ضرر یېتکزیلگنی حقیده خبر بېریلمهگن.
افغانستان بیر نېچه ییللردن بېری کوچلی قورغاقچیلیکنی باشدن کېچیرگن بۉلیب، بو قیشلاق خۉجهلیگی حاصلدارلیگی نینگ کېسکین کمهییشیگه و عایلهلر اقتصادیگه ضرر یېتکزگن. بیراق جاري ییل بهاریدهگی یاغاینگرچیلیکلر سووگه کیریش امکانیتی نینگ یخشیلنیشی و حاصلدارلیک آشیشیگه امید اویغاتگن.
شونگه قرهمهی، موسمی یاغینلری، تۉستدن یوز بېرهدیگن سېل تاشقینلری و دۉل یاغیشی افغانستان بۉیلب قیشلاق خۉجهلیگی اېکینلری و باغلرگه ضرر یېتکزیب، کتّه یۉقاتیشلرگه سبب بۉلگن.
