افغانستان سابق جمهور رییسی حامد کرزی اروپا اتفاقینینگ تشقی سیاست بۉییچه مسوولی کایا کالاسنینگ بیاناتلریگه مناسبت بیلدیریب، افغانستان و اونینگ خلقی پاکستان تامانیدن یرهتیلگن تروریزم نینگ قربانی اېکنینی تأکیدلهدی.
کرزی بوگون (سهشنبه، ۱۲-جوزا) نشر قیلگن بیاناتیده کایا کالاس منطقهدهگی حاضرگی بحراننینگ اصل سببلری و ایلدیزلرینی اۉبژېکت حقیقتلر اساسیده بهالشیگه امید بیلدیرگن. اونگه کۉره، اوشبو بحران افغانستانده کېنگ کۉلملی انساني تلفاتلر و جماعت تاسیساتی نینگ ویران بۉلیشیگه سبب بۉلگن.
کایا کالاس تیناوون اسلام آبادده پاکستان تشقی ایشلر وزیری بیلن اۉتکزگن قۉشمه مطبوعات انجمنیده افغانستاندهگی طالبان و پاکستان دولتی اۉرتهسیدهگی ضدیتلرگه تۉختهلیب، پاکستان خلقارا حقوق دایرهسیده اۉزینی و فقرالرینی حمایه قیلیش حقوقیگه اېگه اېکنینی، بیراق بامباردمان اېمس، ملاقات اېنگ یخشی یېچیم اېکنینی ایتگن اېدی.
شونینگدېک، او مذکور ماجرا آغیر انسانپرورلیک عاقبتلرینی کېلتیریب چیقرگنی، بېقرارلیک و اېکسترېمیزم نینگ ینه-ده کوچهییشی خوفینی آشیرهیاتگنینی تأکیدلب، اروپا اتفاقی هر ایکّی تاماننی وزمینلیککه و کېسکینلیکنی کمهیتیریشگه چقیریب کېلهیاتگنینی بیلدیرگن.
کرزی اېسه بونگه جوابن پاکستاندهگی بوگونگی خوفسیزلیک معمالری اوشبو مملکتنینگ سۉنگگی قیرق ییل دوامیده اېکسترېمیزمنی قۉللب-قوّتلش و اونی افغانستانگه قرشی تشقی سیاست واسطهسی صفتیده قۉللش سیاستی نینگ نتیجهسی اېکنینی تأکیدلهدی.
او اروپا اتفاقیگه اعضا دولتلر و اونینگ انستیتوتلری نینگ افغانستان بیلن همکارلیگینی قدرلشینی بیلدیریب، اروپا اتفاقی و افغانستان اۉرتهسیدهگی مناسبتلر ینه-ده مستحکملنیشیگه امید اظهار قیلدی.
طالبان افغانستانده قَیته حاکمیتنی قۉلگه آلگنیدن بویان پاکستان بیلن چېگرهوي مسألهلر همده ترورچی گروهلر، جملهدن تحریک طالبان پاکستان نینگ افغانستاندهگی فعالیتی یوزهسیدن بیر نېچه بار کېسکین قرهمه-قرشیلیکلرگه دوچ کېلگن.
بو دورده پاکستان بیر نېچه مرته کابل و افغانستان نینگ تورلی ولایتلریگه هوا همده راکت هجوملری اویوشتیرگن، نتیجهده کتّه تلفات و ضررلر یوزهگه کېلگن.
پاکستان اېسه اۉز حدودیگه اویوشتیریلهیاتگن هجوملر افغانستان توپراغیدن عملگه آشیریلهیاتگنینی و طالبان تامانیدن قۉللب-قوّتلنهیاتگنینی دعوا قیلیب، افغانستاندهگی ترورچی تاسیساتلرنی نشانگه آلهیاتگنینی بیلدیرهدی. بیراق، بیرلشگن ملتلر تشکیلاتی حساباتلریده اوشبو هجوملر عاقبتیده یوزلب تینچ اهالی هلاک بۉلگنی و جراحتلنگنی قید اېتیلگن.
