پروان ولایتینینگ شینواري اولسواللیگیده یوز بېرگن ترافیک حادثهسی عاقبتیده۸ کیشی جان بېرگن، ینه ۱۶کیشی یرهلنگن.
طالباننینگ پروان ولایتی امنیه قوماندانلیگی مطبوعات سۉزلاوچیسی فضلالرحیم مسکینیارنینگ معلوم قیلیشیچه، حادثه بوگون (سهشنبه، ۱۲-جوزا) اېرتهلب شینواري اولسواللیگینینگ دره استامه منطقهسیده یوز بېرگن.
اونینگ سۉزلریگه کۉره، یۉلاوچی تشووچی «فلانکوچ» روسومیدهگی موتر یۉلدن چیقیب کېتیب، اغدریلیب کېتگن. نتیجهده 8 کیشی، جملهدن ۴ نفر باله هلاک بۉلگن، ینه ۱۶ کیشی جراحتلنگن.
مسکینیارنینگ ایتیشیچه، جراحتلنگنلر پروان ولایتینینگ مرکزي شفاخانهسیگه یېتکزیلگن. او اولرنینگ احوالی حقیده قۉشیمچه معلومات بېرمهگن.
حادثه سببی حاضرچه معلوم قیلینمهگن.
افغانستانده هر ییلی یوز بېرهدیگن ترافیک حادثهلری عاقبتیده یوزلب آدملر هلاک بۉلهدی و ینه یوزلب کیشیلر جراحت آلهدی.
متصدیلر کۉپینچه بوندهی حادثهلرنینگ اساسي سببلری صفتیده هیداوچیلرنینگ احتیاطسیزلیگی و یۉللرنینگ یامان حالتینی کۉرسهتهدیلر.
هفته باشیده هم لغمان ولایتی نینگ قرغهای اولسواللیگی حدودیده قَیتیب کېلهیاتگن مهاجرلرنی آلیب کېتهیاتگن موترنینگ اغدریلیشی عاقبتیده ۱۸کیشی هلاک بۉلگن و ۲۹ کیشی جراحتلنگن اېدی.
