پاکستان و اروپا اتفاقی قۉشمه بیاناتیده افغانستاندهگی وضعیتگه تۉختهلیب، اوشبو مملکتده ترورچی گروهلرنینگ موجودلیگی همده انسان حقلری احوالینینگ یامانلشهیاتگنیدن خواطر بیلدیرگن.
مذکور بیانات بوگون (دوشنبه۱۱-جوزا) اسلام آبادده بۉلیب اۉتگن پاکستان و اروپا اتفاقی اۉرتهسیدهگی سکّیزینچی استراتژیک ملاقات یکونیده اعلان قیلیندی. اروپا اتفاقینینگ تشقی سیاست بۉییچه مسوولی کایا کالاس و پاکستان تشقی ایشلر وزیری اسحاق دار ییغیلیشگه رئیسلیک قیلدیلر.
بیاناتده ایتیلیشیچه، پاکستان و اروپا رسميلری افغانستاندهگی وضعیت یوزهسیدن فکر المشیب، تروریزم نینگ برچه شکل و کۉرینیشلریگه قرشی کورهشیش مهملیگینی، خلقارا قانونلر همده بیرلشگن ملتلر تشکیلاتی خوفسیزلیک کېنگشینینگ تېگیشلی قطعنامهلریگه موافق روشده تأکیدلهگنلر.
تامانلر افغانستانده ترورچی تشکیلاتلرنینگ موجودلیگیدن جدّي خواطر بیلدیرگن و افغانستان حدودی باشقه دولتلرگه تهدید یاکه هجوم اویوشتیریش اوچون ایشلهتیلمسلیگی کېرهکلیگینی ینه بیر بار قید اېتگن.
اروپا و پاکستان رسميلری افغانستان طالبانیدن افغانستانده فعالیت یوریتهیاتگن یاکه اونینگ حدودیدن فایدهلنهیاتگن برچه ترورچی گروهلرگه قرشی ثمرهلی و تېکشیریلیشی ممکن بۉلگن چارهلرنی کۉریشنی طلب قیلگن.
پاکستاننینگ تأکیدلشیچه، طالبان پاکستان گروهلریگه، جملهدن تحریک طالبان پاکستان (تیتیپی)گه باشپناه بېرگن و بو گروه افغانستان توپراغیدن پاکستاندهگی هجوملرنی تشکیل اېتیشده فایدهلنماقده.
اسلام آباد بیر نېچه بار طالباندن تیتیپیگه قرشی چارهلر کۉریشنی طلب قیلگن. بیراق طالبان بو دعوالرنی رد اېتیب، افغانستان توپراغی هېچ بیر دولت اوچون تهدید اېمسلیگینی تأکیدلهماقده.
اوچ ییل دوام اېتگن ترنگلیکلردن سۉنگ، تامانلر اۉتگن ییل آخریده اۉزارا تۉقنهشووگه کیریشگن. پاکستان اوردوسی افغانستان حدودلریگه کېنگ کۉلملی هوا هجوملری اویوشتیرگن، طالبان اېسه پاکستان حربيلری نینگ چېگره پُوستهلریگه هجوم قیلگن. ایکّی تامان اۉرتهسیدهگی کېسکینلیک چین باشچیلیگیدهگی اَیریم دولتلرنینگ واسطهچیلیگی بیلن کمهیگن.
پاکستان و اروپا اتفاقی نینگ قۉشمه بیاناتیده اروپا تامانی کېسکینلیکلرنی کمهیتیریش، خوفسیزلیککه عاید تشویشلرنی برطرف اېتیش و خلقارا قانونلرگه رعایه قیلیشگه چقیرگنی قید اېتیلگن.
انسان حقلری احوالینینگ یامانلشووی یوزهسیدن خواطر
اروپا و پاکستان رسميلری قۉشمه بیاناتده افغانستانده انسان حقلری، اینیقسه عیاللر و قیزلرنینگ حقوقلری بیلن باغلیق وضعیتنینگ یامانلشهیاتگنیدن هم خواطر بیلدیرگن.
بیاناتده اساسي اېرکینلیکلر، تعلیم آلیش امکانیتی، جماعت حیاتیدهگی اشتراک، شونینگدېک سۉز اېرکینلیگی و مطبوعات اېرکینلیگیگه قۉییلگن چېکلاولر تیلگه آلینگن.
طالبان یشاوچیلرنینگ حقوق و اېرکینلیکلریگه، اینیقسه عیاللر و قیزلرگه نسبتاً قطعي چېکلاولر جاري قیلگن. قریب بېش ییلدن بویان عیاللر و قیزلر تعلیم آلیش همده ایشلش حقوقیدن محروم اېتیلگن.
