اکسپرس تریبون گزېتهسینینگ خبر بېریشیچه، طالبان رهبری هبتالله آخوندزاده تحریک طالبان پاکستان (تیتیپی) گروهیگه پاکستاندهگی هجوملرینی تۉختهتیش حقیده آگاهلنتیریش بېرگن، عکس حالده بو گروه طالبان نینگ قۉللب-قوّتلشیدن محروم بۉلیشی ممکن.
اوشبو یېتکرمه بوگون (دوشنبه، ۱۱-جوزا) «ایشانچلی پاکستانلیک منبع»گه تهیهنیب یازیشیچه، افغانستان طالبانی پاکستاننینگ خوفسیزلیک بۉییچه خواطرلرینی حل اېتیش بارهسیدهگی صمیميتینی کۉرسهتیش مقصدیده اوشبو خبرنی نارهسمي طرزده اسلام آبادگه یېتکزگن.
منبع نینگ قۉشیمچه قیلیشیچه، طالبان بو خبر آرقهلی پاکستانگه افغانستان توپراغیده فعالیت یوریتهیاتگن تیتیپی و باشقه ترورچی گروهلرنی نظارت قیلیشگه اورینهیاتگنینی کۉرستماقچی.
بیراق، اونینگ ایتیشیچه، پاکستان بو قدمنی یېترلی دېب حسابلهمهگن و اونی «عملي میدانده سېزیلرلی اۉزگریش یرهتیش اوچون ضرور بۉلگن مضموندن محروم» دېب بهالهگن.
اکسپرس تریبون، شونینگدېک، موضوعدن خبردار رسميلرگه تهیهنیب یازیشیچه، اسلام آباددهگی اساسي بهالشگه کۉره، طالبان نینگ سۉنگگی ایشانتیرووچی بیاناتلری اساسن خلق ارا و منطقوي باسیملرنی کمهیتیریشگه قرهتیلگن بۉلیب، معما نینگ اصل ایلدیزلرینی حل اېتیشگه اېمس.
پاکستاننینگ یوقاری مرتبهلی عملدارلریدن بیری اکسپرس تریبونگه بېرگن بیاناتیده، پاکستان بهالشلریگه کۉره، طالبان رژیمی نینگ افغانستانده فعال ترورچی گروهلرگه نسبتاً سیاستیده هېچ قندهی سېزیلرلی اۉزگریش کوزهتیلمهگنینی ایتگن.
اونینگ قۉشیمچه قیلیشیچه، «افغانستان فقرالرینی ترور ترماقلریگه جلب قیلیش و یاللش جریانی هنوز دوام اېتماقده». بو اېسه طالبان رسميلری نینگ اسلام آباد خواطرلرینی برطرف اېتیش اوچون قطار چارهلر کۉریلگنی حقیدهگی دعوالریگه ضد.
پاکستانلیک رسمیلرنینگ سۉزلریگه کۉره، طالبان رهبریتی بوندهی قدملر وقت یوتیش و پاکستان باسیمینی کمهیتیریشگه خدمت قیلهدی دېب حسابلهیدی، اما اسلام آباد حلی هم قناعتلنمهگن.
او شوندهی دېگن: «معما ایشانتیریشلر نینگ کملیگیده اېمس، بلکه تېکشیریش ممکن بۉلگن عملي چارهلر یۉقلیگیدهدیر.»
طالبان و پاکستان اۉرتهسیدهگی مناسبتلر اوشبو گروه نینگ افغانستانده قَیته حاکمیتنی اېگهلهگنیدن بېری ترنگ بۉلیب کېلماقده و تامانلر کمیده ایکّی مرته رسماً قوراللی تۉقنهشووگه کیریشگن.
ایکّی تامان اۉرتهسیدهگی سۉنگّی جنگ جاري ییل نینگ فبروری آییده باشلنگن و یقینده چېگره نینگ هر ایکّی تامانیدهگی قبیله آقسقاللری واسطهچیلیگیده تۉختهتیلگن.
شونگه قرهمهی، تامانلر اوروشنی دایمي روشده توگهتیشگه قرهتیلگن کېنگ قمراولی کېلیشووگه حلی اېریشمهگن و ماجرانینگ قَیته باشلنیشی همده هجوملر نینگ ینگیدن اوج آلیشی احتمالی سهقلنیب قالماقده.
طالبان و پاکستان رسميلری کېلیشماوچیلیکلرنی حل قیلیش اوچون منطقه دولتلری واسطهچیلیگیده بیر نېچه بار مذاکره اۉتکزگن، بیراق تیتیپی نینگ افغانستان توپراغیده موجودلیگی و اوندن فایدهلنیشی مسألهسیدهگی قرهمه-قرشی موضعلر سببلی کېلیشووگه اېریشه آلمهگن.
طالبان تیتیپی رهبرلری و اعضالری نینگ افغانستانده موجودلیگینی انکار اېتیب، افغانستان توپراغیدن باشقه دولتلرگه قرشی فایدهلنیشگه هېچ بیر گروهگه رخصت بېریلمسلیگینی تأکیدلهیدی. اما پاکستان رسميلری بو مسأله بۉییچه طالبانگه بیر نېچه بار انکار اېتیب بۉلمهیدیگن دلیللر تقدیم اېتیلگنینی اَیتماقده.
