طالبان نینگ عدلیه وزیرلیگی «غایب شخصلر نینگ کۉچر و کۉچمس ملکلرینی تېکشیریش تۉغریسیده»گی قانون گروه رهبری هبت الله آخوندزاده تامانیدن تصدیقلنگنینی معلوم قیلدی.
وزیرلیک اوشبو قانون نینگ مقصدی غایب شخصلر نینگ مال-ملکینی اونی تصرف اېتیب تورگن شخصلر قۉلیده قالدیریش، طالبان حمایهسیگه آلیش یاکه دولت خزینهسیگه (بَیت المالگه) قَیتریش اوچون حقوقي ترتیب بېلگیلش اېکنینی بیلدیرگن.
قانون نینگ 9-مادّهسیگه کۉره، اگر طالبان نظارتیده سهقلنهیاتگن ملک نینگ اېگهسی، میراثخۉری یاکه وکیلی پیدا بۉلیب، اونی قَیتریشنی طلب قیلسه، قاضی حکمیگه اساسن ملک اېگهسیگه تاپشیریلهدی. بیراق «فساد ترقهتووچیلر» یاکه اولرنینگ ملکلریدن آلینهدیگن درآمدلرنی تاپشیریش طالبان رهبری نینگ علیحده حکمیگه باغلیق بۉلهدی.
مذکور قانونده «فساد ترقهتووچیلر» دېب طالبانگه قرشی بۉلگن، «اۉز مخالفتینی دوام اېتتیرهیاتگن، نزاعلر و بوزغونچیلیکنی کوچهیتیریشگه اورینهیاتگن یاکه بوزغونچیلرنی قۉللب-قوّتلهیاتگن» شخصلر تعریفلنگن.
طالبان رهبری بوندن اوّل هم «فساد ترقهتووچی شخصلر نینگ مال-ملکی» حربي محکمهلر تامانیدن مصادره قیلینیب، سهقلنیشی کېرهکلیگی حقیده فرمان بېرگن اېدی.
حاضرده سابق حکومت نینگ اَیریم عملدارلری همده خارجده یشهیاتگن طالبان مخالفلری نینگ مال-ملکی و کۉچمس ملکلری اوشبو گروه نظارتیده قالماقده.
ینگی قانونگه موافق، طالبان عالي محکمهسی حربي معاونيتی ترکیبیده «غایب شخصلر نینگ کۉچر و کۉچمس ملکلرینی تېکشیریش باشقرمهسی» تشکیل اېتیلگن. اوشبو باشقرمه غایب و بېدرَک یۉقالگن شخصلر نینگ مال-ملکینی حمایه قیلیش اوچون مسوول بۉلهدی.
قانون نینگ 29-مادّهسیده قید اېتیلیشیچه، «اسلام امیرلیگی» حاکمیتنی اېگهلهگنیدن کېین یاکه اوندن اوّل رسمي و نارهسمي شخصلر همده ادارهلر تامانیدن اۉزباشیمچهلیک بیلن اېگهللب آلینگن اوی-جایلر قاضی حکمیگه اساسن اصل اېگهسی یاکه اونینگ شرعي وکیلیگه قَیتریلیشی لازم.
قانون نینگ ینه بیر قِسمیده ایتیلیشیچه، اگر ملک اېگهسی وفات اېتگن بۉلسه و اونینگ هېچ قندهی میراثخۉری یاکه قانوني دعواگری بۉلمهسه، بوندهی ملک نینگ اېگهسی و وارثی بَیت المال حسابلنهدی همده اوشبو ملک دولت خزینهسیگه اۉتکزیلهدی.
