هالند قاچقینلر ایشلری وزیرلیگی افغانستانلیک عیاللر و قیزلرنینگ اوشبو مملکتدن باشپناه آلیش اوچون رخصتنامه آلیش احتمالی اېندی انچه یوقاری اېکنینی معلوم قیلدی.
«هالند تایمز» نشرینینگ خبر بېریشیچه، هالند قاچقینلر ایشلری وزیری بارت ون دن برینک نینگ قراریگه کۉره، افغانستانلیک عیاللر و قیزلر «اکثریت حاللرده» یشش رخصتنامهسینی آلیش طلبلریگه جواب بېرهدیگن طایفه صفتیده بهالنهدی.
بارت ون دن برینک بو قرارنی هالند تشقی ایشلر وزیرلیگی متصدیلری طالبان حکمرانلیگی آستیده عیاللر و قیزلرنینگ احوالی ینه-ده یامانلشگنی حقیده آگاهلنتیرگنیدن سۉنگ قبول قیلگن.
وزیرنینگ ایتیشیچه، او افغانستانلیک باشپناه ایزلاوچیلرگه نسبتاً قۉللنیلهیاتگن سیاستنی اۉزگرتیردی، چونکه موجود سیاست اېندی افغانستاندهگی رئال وضعیتنی یېترلیچه عکس اېتتیرمهیدی.
«هالند تایمز»نینگ یازیشیچه، ۲۰۲۵-ییلده عملده بۉلگن سیاست اساسیده جمعی۷۶۰ نفر افغانستانلیک هالنددن باشپناه سۉرهگن. بو کۉرستکیچ۲۰۲۴-ییلده۴۹۰ نفرنی،۲۰۲۳ییلده اېسه۶۷۰ نفرنی تشکیل اېتگن.
هالندنینگ باشپناه سیاستی ۲۰۲۵ییل آخریده مهاجرت و فقرالیک خدمتی (آیاندی) همده کېینچهلیک وزیر دیوید ون ویل بیر نېچه افغان عیاللری نینگ باشپناه عریضهلرینی رد اېتگنیدن سۉنگ کېسکین تنقیدلرگه اوچرهگن اېدی. ون ویل اۉشه پیتده عیاللر نظري جهتدن طالبان رژیمی آستیدهگی حیاتگه «ماسلشه آلیشی ممکن»لیگینی ایتگن اېدی.
«هالند تایمز » نینگ یازیشیچه، جماعتچیلیکنینگ کېسکین عکسالملی و بیر قطار حقوقي دعوالردن سۉنگ، قاچقینلر ایشلری وزیری ۲۰۲۶-ییل باشیده سیاستنی اۉزگرتیریب، یکونده تۉرت نفر افغان عیالیگه یشش رخصتنامهسینی بېرگن.
