بیرلشگن ملتلر تشکیلاتینینگ بالهلرنی قۉللب-قوّتلش جمغرمهسی (یونیسف) یقینده طالبان تامانیدن اعلان قیلینگن «اېر-خاتینلرنی اجرهتیش نظامی»دن چوقور خواطر بیلدیرگنینی ایتدی.
یونیسف اجراچی دیرېکتوری کاترین راسل بوگون (چهارشنبه، ۶-جوزا) ایکس اجتماعی ترماغیده اوشبو نظامگه اشاره قیلیب شوندهی دېدی: «بالهلر نکاحینی قانونيدېک کۉرسهتهدیگن یاکه قیزنینگ سکوتینی راضیلیک صفتیده تلقین قیلهدیگن هر قندهی قانون قبول قیلیب بۉلمهیدیگن حالت دیر.»
طالبلر رهبری هبتالله آخوندزاده تامانیدن تصدیقلنگن و امضالنگن «اېر-خاتینلرنی اجرهتیش نظامی» یقینده اوشبو گروه نینگ عدلیه وزیرلیگی تامانیدن اعلان قیلینگن اېدی.
مذکور نظامده «باله نکاحی» بالواسطه تن آلینگن همده اجرهشیش حقوقیده اېرککلر و عیاللر اۉرتهسیده کمسیتیش موجود.
طالبلر اوشبو نظامده نکاح اوچون هېچ قندهی مینیمال یاشنی بېلگیلهمهگن، بیراق بالهلر نکاحینی قندهی بېکار قیلیش یاکه مجبورن تورموشگه بېریلگن باله نینگ بلاغت یاشیگه یېتگچ نکاحنی بېکار قیلیشنی سۉرهشی ممکنلیگی حقیده توشونتیریش بېرگن.
بیرلشگن ملتلر تشکیلاتی نینگ افغانستاندهگی یاردم ادارهسی یوناما اېسه «بلاغت یاشیگه یېتگن و نکاحلنگن قیزلرنی اجرهتیش بۉییچه علیحده بۉلیم اجرهتیلگنی باله نکاحی نینگ قانونيلشتیریلهیاتگنینی انگلهتهدی»، دېدی.
یوناما طالباندن افغانستان نینگ خلقارا قانونلر بۉییچه مجبوريتلریگه رعایه قیلیشنی همده بالهلرنی خلق ارا قانونلرگه موافق حمایه قیلیش بۉییچه اۉز مجبوريتلرینی بجریشنی طلب قیلدی.
